KGFची नवीन विक्रमाला गवसणी; भोजपुरी व्हर्जनला यूट्यूबवर मिळाले सर्वाधिक व्हूज..!

KGFच्या भोजपुरी व्हर्जनला यूट्यूबवर 616+ मिलियन व्ह्यूज मिळाले आहेत. यूट्यूबवर यापेक्षा जास्त व्ह्यूज कोणत्याही चित्रपटाला मिळाले नाहीत.

KGF Movie: दाक्षिणात्य चित्रपट एकामागून एक नवीन ट्रेंड सेट करत आहेत. गेल्या काही वर्षात साऊथ चित्रपटांचा प्रभाव मोठ्या प्रमाणात वाढला आहे. साऊथच्या चित्रपटांसमोर बॉलिवूड चित्रपटही फेल ठरत आहेत. आता हिंदीसोबत भोजपुरी चित्रपटसृष्टीतही साऊथचे सिनेमे आपला दबदबा निर्माण करताना दिसत आहेत. भोजपुरी भाषेला आजवर देशात संवैधानिक दर्जा मिळाला नसेल, पण भोजपुरी सिनेमाने आपला दबदबा निर्माण करायला सुरुवात केली आहे. दाक्षिणात्य अभिनेता यशच्या KGF या चित्रपटाने भोजपुरीमध्ये एक नवा विक्रम प्रस्थापित केला आहे. हा चित्रपट जगात तर यशस्वी झालाच पण भोजपुरी चित्रपटसृष्टीतही याने झेंडा रोवला.

KGF ने नवा विक्रम केला
KGF हा देशातील सर्वात यशस्वी चित्रपटांपैकी एक आहे. चित्रपटाचा दुसरा भाग जगभरात तुफान चालला, पण आता याच्या पहिल्या भागाने एक नवा विक्रम प्रस्थापित केला आहे. KGF चित्रपटाच्या दोन्ही भागांनी देश-विदेशात चांगला व्यवसाय केला. KGF 2 ने जगभरात 1210 कोटी रुपयांची कमाई केली तर, दोन्ही भागांची कमाई 1500 कोटींच्या घरात आहे. KGF चा पहिला भाग 2018 मध्ये रिलीज झाला होता. हा चित्रपट भोजपुरीमध्ये डब करण्यात आला आणि 2020 मध्ये यूट्यूबवर प्रदर्शित झाला.

सर्वाधिक व्हू मिळाले
KGFच्या भोजपुरी व्हर्जनला यूट्यूबवर आतापर्यंत 616 मिलियन व्ह्यूज मिळाले आहेत. यूट्यूबवर यापेक्षा जास्त व्ह्यूज कोणत्याही चित्रपटाला मिळाले नसल्याचा दावा केला जात आहे. अशा परिस्थितीत केजीएफ भोजपुरीत सर्वाधिक पाहिला जाणारा चित्रपट ठरला आहे. KGF ने आणखी एक विक्रम आपल्या नावावर केला आहे. या चित्रपटाला यूट्यूबवर सर्वाधिक 5.9 दशलक्ष लाईक्सही मिळाले आहेत. त्यामुळे केजीएफच्या नावे आता आणखी एक विक्रम प्रस्थापित झाला आहे.