आर्यननंतर आता किंग खानचा धाकटा लेक अबरामचेही सिनेसृष्टीत पाऊल, ट्रेलर आला समोर

'मुफासा: द लायन किंग'चा दुसरा ट्रेलर प्रदर्शित झाला आहे.

 'मुफासा: द लायन किंग' या चित्रपटाची प्रेक्षक गेल्या अनेक दिवसांपासून प्रतीक्षा करत होते. अशातच आता या सिनेमाचा दुसरा ट्रेलर प्रदर्शित झाला आहे.  'मुफासा : द लायन किंग'च्या हिंदी डब्ड व्हर्जनमध्ये शाहरुख खान, त्याचा मोठा मुलगा आर्यन खान व लहान मुलगा अबराम यांनी आवाज दिला आहे. यामुळे सिनेमा रिलीजपूर्वी चाहत्यांमध्ये उत्सुकता शिगेला पोहोचली आहे.

 शाहरुख खानने मुफासाला आवाज दिला. तर आर्यन खानने मुफासाचा मुलगा सिंबाला आणि अबराम खानने तरुण मुफासाला आपला आवाज दिला आहे. अशाप्रकारे शाहरुख-आर्यन आणि अबराम आगामी 'मुफासा द लायन किंग' सिनेमाच्या निमित्ताने एकत्र येत आहेत.

अ‍ॅनिमेशन चित्रपट 'द लायन किंग' हा चित्रपट 1994 मध्ये प्रदर्शित झाला. हा चित्रपट प्रेक्षकांना खूप आवडला होता. त्यानंतर 2019 मध्ये या चित्रपटाचा एक रीमेक बनवण्यात आला. आता तब्बल 5 वर्षानंतर त्याचा प्रीक्वल येणार आहे तर या प्रीक्वलचं नाव 'मुफासा: द लायन किंग' असं ठेवण्यात आलं आहे. हा सिनेमा २० डिसेंबर २०२४ ला रिलीज होणार आहे.