Don 3: फरहान अख्तरच्या 'डॉन 3'मधून शाहरूख खान पडला बाहेर? नवीन अभिनेत्याचा शोध सुरू

'डॉन ३' (Don 3) या चित्रपटासंदर्भात नवीन वृत्त समोर आले आहे. नुकतेच निर्माता रितेश सिधवानी यांनी या चित्रपटाच्या निर्मितीला मंजुरी दिली. ते म्हणाले की फरहान अख्तर (Farhan Akhtar) 'डॉन 3' वर काम करत आहे. काम पूर्ण झाल्यानंतर त्याची अधिकृत घोषणा केली जाईल. ही बातमी समोर येताच चाहत्यांच्या आनंदाला उधाण आले आहे. पण आता या चित्रपटाशी संबंधित आणखी एक महत्त्वाची बातमी येत आहे, ज्यामुळे चाहत्यांची निराशा होऊ शकते.

'डॉन ३' या चित्रपटावर काम सुरू असल्याची पुष्टी झाली आहे. पण, मीडिया रिपोर्ट्सनुसार, शाहरुख खान या चित्रपटाचा भाग असणार नाही. रिपोर्ट्सनुसार, फरहान अख्तर आणि रितेश सिधवानी यांनी 'डॉन ३' संदर्भात शाहरुख खानशी अनेकदा सविस्तर चर्चा केली आहे. कोविड साथीच्या आजारापूर्वीही याबद्दल अनेक कल्पना शेअर केल्या गेल्या होत्या.
सूत्रांकडून मिळालेल्या माहितीनुसार, फरहान अख्तरने डॉनच्या तीन पिढ्या म्हणजेच अमिताभ बच्चन, शाहरुख खान आणि पुढच्या पिढीतील स्टार यांना 'डॉन 3'मध्ये एकत्र आणण्याची कल्पना दिली होती. मात्र ही कल्पना फ्लॉप होऊ शकते, असे शाहरुख खानचे मत आहे. अशा परिस्थितीत किंग खानने टीमला या प्रोजेक्टमधून बाहेर पडत असल्याचे सांगितले.
फरहान सध्या महिला केंद्रित चित्रपट 'जी ले जरा'मध्ये व्यस्त आहे. या चित्रपटात कतरिना कैफ, प्रियांका चोप्रा आणि आलिया भट महत्त्वाच्या भूमिकेत दिसणार आहेत. नोव्हेंबरपासून या चित्रपटावर काम सुरू होणार आहे. त्याचबरोबर हा चित्रपट २०२४ मध्ये प्रदर्शित होऊ शकतो.