Pathaan: रेकॉर्डब्रक कमाई! 'पठाण' सिनेमानं रचला इतिहास; मध्यरात्रीचा शोदेखील हाऊसफुल

चाहत्यांमध्ये किंग खानचा चित्रपट पाहण्याचा उत्साह पाहून वायआरएफच्या निर्मात्यांनी रात्री उशिरा शो सुरू केले आहेत.

मुंबई - बॉलिवूडचा किंग शाहरुख खानचा बहुचर्चित सिनेमा 'पठाण' सिनेमागृहात आला आणि प्रतीक्षा संपली! तब्बल ४ वर्षानंतर शाहरुख खानने रुपेरी पडद्यावर धडक दिलीय त्यामुळे चाहते वेडे झाले आहेत. पठाण केवळ यशस्वीच नाही तर त्याला बॉलिवूडसाठी ऑक्सिजन असल्याचं म्हटलं जात आहे. २०२२ चा दुष्काळ २०२३ च्या सुरुवातीलाच पठाण चित्रपट संपवण्याच्या तयारीत आहे. चित्रपट पाहण्यासाठी चाहते प्रचंड उत्सुक आहेत. चित्रपटगृहांबाहेर लोकांची गर्दी दिसून येत आहे. 

'पठाण'ने इतिहास रचला
चित्रपटगृहांमध्ये मध्यरात्री १२:३० सिनेमाचे शो सुरू होताना अनेक वर्षांनी पाहायला मिळाले आहे. शाहरुख खानच्या 'पठाण'ने खरोखरच इतिहास रचला आहे. चाहत्यांमध्ये किंग खानचा चित्रपट पाहण्याचा उत्साह पाहून वायआरएफच्या निर्मात्यांनी रात्री उशिरा शो सुरू केले आहेत. यासोबतच दुसऱ्या दिवशी सकाळी शो देखील वाढवण्यात आले आहेत. २६ जानेवारीची सुट्टी पठाणसाठी फायदेशीर ठरणार आहे. आतापर्यंत हा चित्रपट जगभरात आठ हजार स्क्रीन्सवर प्रदर्शित झाला आहे. दिवस रात्रीचे बहुतेक शो हाऊसफुल्ल झाले आहेत. 

'पठाण'ने केली १२ तासात करोडोंची कमाई
शाहरुख खानच्या 'पठाण' चित्रपटाने रिलीजच्या पहिल्याच दिवशी रेकॉर्डब्रेक कमाई केली आहे. तरण आदर्शच्या म्हणण्यानुसार, चित्रपटाने अप्रतिम कामगिरी केली आहे. पीव्हीआर, आयनॉक्स आणि सिनेपोलिसचा एकूण आढावा घेतला तर दुपारी ३ वाजेपर्यंत 'पठाण'ने सुमारे २० कोटींची कमाई केल्याचे बोलले जात आहे.

सलमानने केला 'किसी का भाई किसी की जान'चा टीझर रिलीज 
किंग खाननं सकाळी एन्ट्री केली तर भाईजाननं संध्याकाळी जलवा दाखवला. शाहरुख खानचा 'पठाण' चित्रपट २५ जानेवारीला थिएटरमध्ये रिलीज झाला. आणि बघा, त्याच दिवशी संध्याकाळी भाईजान चाहत्यांना सरप्राईज घेऊन आला. सलमान खानच्या 'किसी का भाई किसी की जान' या चित्रपटाचा टीझर रिलीज केला आहे. भाईजानच्या लांब केसांच्या स्वॅगने सगळ्यांनाच त्याचे वेड लावले आहे.