बॉलिवूडचे 'करण-अर्जुन' पुन्हा एकत्र दिसणार! तब्बल २७ वर्षांनी शाहरूख-सलमान एकाच चित्रपटात

Salman and shahrukh khan:एकेकाळी एकमेकांचे घनिष्ट मित्र असलेल्या या दोघांच्या नात्यात वादाची ठिगणी पडली होती. तेव्हापासून जवळपास २७ वर्ष हे दोन्ही कलाकार एकमेकांचा चेहरादेखील पाहात नव्हते.

बॉलिवूड अभिनेता सलमान खान (salman khan) आणि शाहरुख खान (shahrukh khan) यांच्यातील वाद सर्वश्रुत आहे. एकेकाळी एकमेकांचे घनिष्ट मित्र असलेल्या या दोघांच्या नात्यात वादाची ठिगणी पडली होती. तेव्हापासून जवळपास २७ वर्ष हे दोन्ही कलाकार एकमेकांचा चेहरादेखील पाहात नव्हते. परंतु, तब्बल २७ वर्षांनंतर या दोघांमधील वाद मिटला असून पुन्हा एकदा त्यांच्यात मैत्रीचं नातं निर्माण झालं आहे. इतकंच नाही तर आता ही जोडी लवकरच प्रेक्षकांना एकत्र स्क्रीन शेअर करताना दिसणार आहे.

करण-अर्जुन (karan arjun) या गाजलेल्या चित्रपटात सलमान आणि शाहरुखने एकत्र स्क्रीन शेअर केली होती. पडद्यावर भावंडांच्या भूमिकेत झळकलेल्या या दोघांनाही प्रेक्षकांकडून भरभरून प्रेम मिळालं होतं. मात्र, या चित्रपटानंतर ही जोडी पुन्हा कधीच एकत्र पाहायला मिळाली नाही. त्यामुळे या दोघांना एकदा तरी एकत्र पाहता यावं अशी चाहत्यांची मनापासून इच्छा होती. विशेष म्हणजे २७ वर्षांचा वाद विसरुन ही जोडी हळूहळू त्यांच्या मैत्रीची पावलं पुन्हा एकदा पुढे सरकवत आहेत. त्यामुळे आतापर्यंत गेल्या काही वर्षात दोघांनीही एकमेकांच्या चित्रपटात कॅमियो रोल केला होता. मात्र, आता पहिल्यांदाच हे दोघं फूल टाइम संपूर्ण चित्रपटात एकत्र स्क्रीन शेअर करणार आहेत. याविषयी 'पिंकव्हिला'च्या वृत्तात नमूद करण्यात आलं आहे.

'या' चित्रपटाच्या निमित्ताने भाईजान-किंग खान येणार एकत्र

सूत्रांच्या माहितीनुसार, आदित्य चोप्रा निर्मित एका अॅक्शनपटात ही जोडी एकत्र झळकणार आहे. या चित्रपटात पहिल्यांदाच दोघांचाही जबरदस्त लूक पाहायला मिळणार आहे. सध्या सोशल मीडियावर या चित्रपटाची केवळ चर्चा सुरु आहे. परंतु, कलाकारांकडून अद्यापही कोणती अधिकृत घोषणा करण्यात आलेली नाही.

दरम्यान,  गेल्या काही वर्षांपासून आदित्य चोप्रा एका चित्रपटावर काम करत आहेत. सध्या या चित्रपटाची कथा, पटकथा यांच्यावर काम सुरु असून हा चित्रपट २०२३ च्या अखेरीस किंवा २०२४ च्या सुरुवातीला चित्रपटाच्या चित्रीकरणाला सुरुवात होणार आहे. 'पठाण' आणि 'टायगर 3' चं काम पूर्ण झाल्यावर दोन्ही कलाकार या आगामी चित्रपटाकडे वळणार आहेत.