राहुल वैद्यचं आणखी एक स्वप्न झालं पूर्ण, आधी खरेदी केली महागडी कार आता घेतलं आलिशान घर!

राहुल वैद्यने वांद्रेमध्ये नवीन घर खरेदी केले आहे. या घराची किंमत लाखांमध्ये नाही तर कोटींमध्ये आहे.

Rahul Vaidya Bought New Apartment : लोकप्रिय गायक आणि विविध रिअ‍ॅलिटी शोमधून घराघरात पोहोचलेल्या मराठमोळ्या राहुल वैद्यचा (Rahul Vaidya) एक मोठा चाहतावर्ग आहे. राहुलने आतापर्यंत अनेक हिट गाणी दिली आहेत. नुकतंच राहुलने एक आलिशान घर खरेदी केले आहे. राहुलने काही दिवसांपुर्वीच त्याने एक महागडी गाडी खरेदी केली होती. आता त्याने घर घेण्याचं दुसरं स्वप्न पूर्ण केलं आहे.

राहुल वैद्यने वांद्रेमध्ये नवीन घर खरेदी केले आहे. या घराची किंमत लाखांमध्ये नाही तर कोटींमध्ये आहे. तब्बल  9 कोटी त्याने या घरासाठी मोजले आहेत.  स्क्वेअर यार्डच्या अहवालात ही बाब समोर आली आहे. नवीन खरेदी केलेले अपार्टमेंट डीएलएच सिग्नेचरमध्ये आहे, हे वांद्रे पश्चिम येथील डीएलएच ग्रुपचा प्रीमियम प्रकल्प आहे. या १.२५ एकरमध्ये पसरलेल्या संकुलात विविध सुविधा आहेत. गेल्या ऑक्टोबर महिन्यात राहुल वैद्यने या घराचा व्यवहार पूर्ण केल्याचं माहिती आहे. या घरासाठी त्याने ५६ लाख ३७ हजार रूपयांची स्टॅम्पड्युटी आणि ३० हजार रूपये नोंदणीशुल्क भरले.

राहुल वैद्यने ऑगस्ट महिन्यात सुमारे 2 कोटी रुपयांची रेंज रोव्हर कार (Rahul Vaidya Bought Range Rover)  खरेदी केली होती. राहुलकडे रेंज रोव्हरशिवाय, ऑडी आणि मर्सिडीज सारख्या कारचे कलेक्शन आहे. राहुलच्या वर्कफ्रंटबद्दल बोलायचं झाल्यास, बारावीत शिकत असताना त्याने इंडियन आयडॉल या स्पर्धेत भाग घेतला होता. अंतिम तो फेरीत पराभूत झाला होता. त्यानंतर त्यांची लोकप्रियता खूप वाढली. २००८ मध्ये, त्याने 'जो जीता वही सुपरस्टार' हा रिअ‍ॅलिटी सिंगिंग शोचा किताब जिंकला. 'बिग बॉस १४' आणि 'खतरों के खिलाडी ११' मध्ये भाग घेतला होता.  'खतरों के खिलाडी ११' मध्ये तो फायनलिस्ट झाला होता. अलिकडेच तो 'लाफ्टर शेफ'मध्ये दिसला होता.