'तान्हाजी' सिनेमातील सोयराबाई सध्या गिरवताहेत किक बॉक्सिंगचे धडे

तान्हाजी चित्रपटात सोयराबाईची भूमिका अभिनेत्री इलाक्षी गुप्ता हिने साकारली आहे.

तान्हाजी: द अनसंग वॉरियर चित्रपटाला बॉक्स ऑफिसवर खूप चांगला रिस्पॉन्स मिळाला. चित्रपट प्रदर्शित होऊन २६ दिवस उलटलेले असतानाही चित्रपटाची घौडदौड अद्याप कायम आहे. आतापर्यंत जवळपास २४६ कोटींचा बिझनेस चित्रपटाने केला आहे. या चित्रपटातून अभिनेत्री इलाक्षी गुप्ता हिने बॉलिवूडमध्ये पदार्पण केले. तिने या चित्रपटात सोयराबाईची भूमिका साकारली होती आणि या भूमिकेतून ती घराघरात पोहचली. 

इलाक्षी एक डेंटल सर्जन असून फिटनेस फ्रीक सुद्धा आहे. ती दररोज जिममध्ये इंटेन्स वर्कआऊट आणि पिलाटेस सेशन करते. त्या व्यतिरिक्त किक बॉक्सिंग सुद्धा शिकते आहे. इलाक्षीचे म्हणणं आहे की, बॉलिवूडमध्ये काम करण्यासाठी पूर्णपणे तयार होण्यासाठी मी किक बॉक्सिंग शिकते आहे. 

इलाक्षी कोणत्या आगामी चित्रपटासाठी किक बॉक्सिंग शिकते आहे की नाही, हे आगामी काळात समजेल.

तान्हाजी चित्रपटातून पदार्पण करण्याच्या आधी इलाक्षीने "कोल्ड लस्सी" आणि "चिकन मसाला" या वेबसीरिजमध्ये काम केले आहे.

तान्हाजी हा चित्रपट अजय देवगणचा १०० वा चित्रपट आहे. अजयने यात मराठावीर योद्धा तानाजी मालुसरेंची भूमिका साकारली आहे. या भूमिकेसाठी अजयनेच नव्हे तर संपूर्ण स्टारकास्टने अपार मेहनत घेतली. मराठ्यांच्या पराक्रमाची गाथा सांगणाऱ्या या चित्रपटाला प्रेक्षकांनी अक्षरशः डोक्यावर घेतले आहे