'मुंज्या' सिनेमातील पहिलं गाणं 'तरस' झालं रिलीज, शर्वरी वाघच्या डान्सने वेधलं लक्ष

हॉरर-कॉमेडी चित्रपट 'मुंज्या'चा ट्रेलर नुकताच प्रदर्शित झाला. नुकतेच या चित्रपटातील पहिले गाणे 'तरस' रिलीज झाले आहे. या गाण्यावर शर्वरी वाघ थिरकताना दिसत आहे.

'स्त्री' आणि 'भेडिया' नंतर दिग्दर्शक दिनेश विजानचा मुंज्या (Munjya Movie) हा तिसरा हॉरर-कॉमेडी चित्रपट प्रेक्षकांच्या भेटीला येत आहे. मॅडॉक फिल्म्सचा नवीन हॉरर-कॉमेडी चित्रपट 'मुंज्या'चा ट्रेलर नुकताच प्रदर्शित झाला. या चित्रपटाचा ट्रेलरही प्रेक्षकांना खूप आवडला आहे. ट्रेलरमध्ये प्रेक्षकांना मुंज्याचा कहर स्पष्टपणे दिसत होता, तर नुकतेच या चित्रपटातील पहिले गाणे 'तरस' रिलीज झाले आहे. या गाण्यावर शर्वरी वाघ (Sharvari Wagh) थिरकताना दिसत आहे.

शर्वरी वाघ २०२१ मध्ये थिएटरमध्ये प्रदर्शित झालेल्या 'बंटी और बबली २' या चित्रपटात शेवटची दिसली होती. आता ४ वर्षांच्या दीर्घ कालावधीनंतर शर्वरी रुपेरी पडद्यावर पुनरागमन करण्यासाठी सज्ज झाली आहे. सध्या ती तिच्या आगामी 'मुंज्या' या चित्रपटामुळे सतत चर्चेत असते. आज 'मुंज्या'चे पहिले गाणे 'तरस' रिलीज झाले आहे. या गाण्यात शर्वरी वाघचा जबरदस्त डान्स पाहायला मिळतो आहे. या गाण्यातील शर्वरी वाघच्या जबरदस्त डान्स मूव्ह्स प्रेक्षकांना खूप आवडल्या आहेत. हे गाणे जास्मिन सँडलस आणि सचिन जिगर यांनी गायले आहे. या गाण्याचे बोल अमिताभ भट्टाचार्य यांनी लिहिले आहेत. 'मुंज्या' चित्रपटातील 'तरस' हे गाणे रिलीज झाल्यानंतर सोशल मीडियावर मोठ्या प्रमाणात व्हायरल होत आहे.

गाण्याबद्दल शर्वरी म्हणाली...
शर्वरी म्हणते, “निर्माते दिनेश विजान यांनी माझ्यावर खूप मोठा विश्वास दाखवला. इतका मोठा डान्स ट्रॅक तयार केला. माझ्या खांद्यावर खूप मोठी जबाबदारी टाकली आणि मी त्याला न्याय देण्याचा प्रयत्न केला. माझ्या खात्यात एक हिट डान्स सॉन्ग आहे! मला 'तरस'च्या प्रत्येक गोष्टीची शूटिंग करायला आवडली. मी प्रार्थना करते 'तरस' एक मोठा ब्लॉकबस्टर गाणे बनो आणि क्लब, पार्टी आणि प्रत्येक प्रसंगावर प्रत्येकजण यावर नाचू शकेल! माझ्या करिअरच्या सुरुवातीलाच मला एक मोठे गाणे मिळाले, हे मला खूप प्रेरित करते. 

'मुंज्या'बद्दल

'मुंज्या'च्या ट्रेलरमध्ये चेटुकवाडीची कहाणी दाखवण्यात आली होती, जे शापित ठिकाण आहे. या ठिकाणी मुंज्याच्या अस्थी गाढलेल्या आहेत. खरंतर मुंज्याला मुन्नीशी लग्न करायचं होतं, पण लग्नाआधीच मुंज्याचा मृत्यू होतो. हा चित्रपट तुम्हाला घाबरवणार असला तरी, हा चित्रपट तुम्हाला हसवेल, कारण चित्रपटात भयपटांसोबतच कॉमेडीचा जबरदस्त मिलाफ पाहायला मिळेल. सूर्यास्तानंतर मुंज्या येतो आणि त्याची शेवटची इच्छा म्हणजे मुन्नीशी लग्न करायचं पूर्ण करायचे आहे. 

७ जूनला चित्रपट होणार रिलीज

'मुंज्या'मध्ये अभय वर्मा, मोना सिंह आणि एस सत्यराज देखील महत्त्वाच्या भूमिकेत दिसणार आहेत, ज्याची झलक ट्रेलरमध्ये स्पष्टपणे दिसत होती. या चित्रपटाचे दिग्दर्शन आदित्य सरपोतदार यांनी केले आहे. दिनेश विजन आणि अमर कौशिक या चित्रपटाचे निर्माते आहेत. योगेश चांदेकर यांनी त्याची कथा लिहिली आहे. हा चित्रपट ७ जून २०२४ रोजी प्रेक्षकांच्या भेटीला येणार आहे.