'त्रिदेव' फेम अभिनेत्री सोनम खान तीन दशकानंतर करतेय कमबॅक, या कारणामुळे सोडली होती सिनेइंडस्ट्री

'त्रिदेव' चित्रपटातील 'तिरची टोपी वाले' या गाण्यातून ९०च्या दशकात रातोरात स्टार बनलेली सोनम खान (Sonam Khan) प्रदीर्घ काळानंतर तिच्या कमबॅकमुळे चर्चेत आहे. बिग बॉस ओटीटीच्या आगामी सीझनमधून सोनम खान सिनेइंडस्ट्रीत पुनरागमन करू शकते, असे वृत्त आहे. 'विश्वात्मा' अभिनेत्री सोनम खान तब्बल ३ दशकांनंतर इंडस्ट्रीत परतण्याच्या तयारीत असल्याचे बोलले जात आहे.

ईटाइम्सच्या एक्सक्लुझिव्ह रिपोर्टनुसार, सोनम 'बिग बॉस OTT 3' च्या घरात प्रवेश करण्यास तयार आहे. सोनम या घरात एक स्पर्धक म्हणून एन्ट्री करणार आहे आणि इथून ती जवळपास ३ दशकांच्या प्रदीर्घ कालावधीनंतर पुन्हा सुरुवात करत आहे, असे बोलले जात आहे. सोनमचा शेवटचा चित्रपट 'इन्सानियत' १९९४ साली प्रदर्शित झाला होता.

सोनमने यशाच्या शिखरावर असताना सोडली इंडस्ट्री
जेव्हा सोनमने इंडस्ट्री सोडण्याचा निर्णय घेतला तेव्हा ती चित्रपट जगतातील टॉप कलाकारांपैकी एक होती. सोनमला तिच्या करिअरऐवजी वैवाहिक जीवनावर लक्ष केंद्रित करायचे होते. तिने दिग्दर्शक राजीव रायशी लग्न केले आणि ते २०१६ मध्ये वेगळे झाले. गेल्या वर्षी सोनम अचानक सार्वजनिकपणे दिसली आणि तेव्हापासून ती तिच्या पुनरागमनाबद्दल बोलताना दिसत होती. सूत्रांकडून मिळालेल्या माहितीनुसार, त्यांना असे वाटते की हे पुनरागमनाचे एक चांगले माध्यम ठरू शकते.