मिस युनिवर्स हरनाज कौर संधू अडचणीत, 'कपिल शर्मा शो' फेम अभिनेत्रीनं केले गंभीर आरोप

हरनाज सध्या अडचणीत सापडली आहे. हरनाजवर गुन्हा दाखल करण्यात आला आहे.

 मिस यूनिवर्स २०२१ हरनाज कौर संधू (Harnaaz Kaur Sandhu) कोणत्या ना कोणत्या कारणामुळे चर्चेत असते. सध्या ती एका वेगळ्याच कारणामुळे चर्चेत आली आहे. हरनाज सध्या अडचणीत सापडली आहे. 'काॅमेडी नाईट्स विथ कपिल शर्मा' फेम उपासना सिंग  (Upasana Singh)ने हरनाजवर गंभीर आरोप केले आहेत. उपासना सिंगने हरनाज विरोधात न्यायालयात धाव घेतली आहे. त्यामुळे सोशल मीडियावर या प्रकरणाची सध्या जोरदार चर्चा आहे. 

उपासना सिंगने हरनाजवर केले आरोप 
हरनाज लवकरच ‘बाई जी कुटंगे’  या पंजाबी चित्रपटात झळकणार आहे. याची निर्माती उपासना सिंग आहे. पंजाबी चित्रपटासाठी केलेल्या कराराचा भंग केल्याप्रकरणी उपासना सिंगनं हरनाज विरोधात न्यायालयात धाव घेतली आहे. उपासना सिंगने सांगितले,   ‘बाई जी कुटंगे’ हा चित्रपट मे महिन्यात प्रदर्शित होणार होता, पण हरनाजने तिला चित्रपटाच्या प्रमोशनसाठी वेळ दिला नाही. तिने अनेकवेळा हरनाजशीअनेक मार्गांनी संपर्क साधण्याचा प्रयत्न केला, परंतु तिला प्रतिसाद दिला नाही. तिने हरनाजला  फोन, मेसेज आणि मेल्सही केले, तरीही तिने कोणत्याही प्रतिसाद दिला नाही. 

त्यामुळे उपासना सिंगने आता न्यायालयात धाव घेतली आहे. उपासना सिंग म्हणाला, कॉन्ट्रॅक्टनुसार हरनाजला 25 दिवसांसाठी चित्रपटाचे प्रमोशन करायचे होते, मात्र आता केवळ पाच दिवसच चित्रपटाचे प्रमोशन केले तर चांगले होईल. उपासनाच्या वकिलाच्या म्हणण्यानुसार, तिने कोर्टात नुकसान भरपाईचा दावा केला आहे. हरनाजनं यावर अद्याप मौन सोडलं नाही. त्यामुळे याप्रकरणी हरनाज काय प्रतिक्रिया देईल हे पाहणंही तितकंच महत्त्वाचं ठरणार आहे.