पाकिस्तानी अभिनेता झाला विक्रांत मेसीचा फॅन, '12th Fail' चं केलं कौतुक

'12 वी फेल' या सिनेमातील विक्रांतच्या कामाने सर्वांना थक्क केलं आहे

बॉलिवूडमधील प्रसिद्ध अभिनेता विक्रांत मेसीचा बहुचर्चित चित्रपट '12th Fail' हा 27 ऑक्टोबर रोजी प्रदर्शित झाला. प्रदर्शित झाल्यानंतर '12th Fail' हा चित्रपट बॉक्स ऑफिसवर दणदणीत कमाई करत आहे. '12 वी फेल' या सिनेमातील विक्रांतच्या कामाने सर्वांना थक्क केलं आहे. फक्त भारतात नाही तर जगभरातील प्रेक्षकांची मनं या चित्रपटानं जिंकली. एका पाकिस्तानी अभिनेत्यानं '12th Fail' सिनेमाचे कौतुक केलं आहे. 

 पाकिस्ताचा प्रसिद्ध अभिनेता बिलाल कुरेशीने आपल्या इन्स्टाग्रामवर '12th Fail' सिनेमाचे पोस्टर शेअर केले. चित्रपट पाहिला आणि तो आवडल्याचे बिलाल कुरेशीने सांगितलं.  स्टोरीमध्ये त्याने लिहलं, खूप आवडला. आपणही अशा प्रकारचे चित्रपट करावेत असे मला वाटतं. आपल्या समाजाच्या कल्याणासाठी हा अत्यंत महत्त्वाचा विषय आहे'. केवळ बिलालच नाही तर विविध देशांतील अनेक अभिनेत्यांनी अभिनेता विक्रांत मेसीने साकारलेल्या भुमिकेचं कौतुक केलं आहे.

वर्ष 2023 च्या सुपरहिट चित्रपटांपैकी एक असलेला विक्रांत मेसी स्टारर '12th Fail' चित्रपट आता OTT वर प्रदर्शित झाला आहे. या सिनेमाने समीक्षक आणि प्रेक्षक दोघांचीही मने जिंकली आहेत. मोठ्या पडद्यावर मिळालेल्या जबरदस्त यशानंतर आता निर्मात्यांनी हा चित्रपट Disney+Hostar वर प्रदर्शित केला आहे.

आपल्या करिअरमध्ये अनेक आयकॉनिक सिनेमे बनवणारे विधू विनोद चोप्रा  यांनी या सिनेमाच्या दिग्दर्शनाची धुरा सांभाळली. विक्रांत मेसीचा हा सिनेमा अनुराग पाठक यांच्या  '12th Fail'  या पुस्तकावर आधारलेला आहे. आयपीएस मनोज शर्मा यांच्या संघर्षाची, जिद्दीची, प्रामाणिकपणाची, चिकाटीची, स्वाभिमानाची आणि अपार कष्टांची हि कथा आहे. तसेच देशातील शिक्षण व्यवस्था, लोकांची विचारसरणी आणि व्यवस्थेवरही हा सिनेमा भाष्य करतो.