THROWBACK : रोल कट झाला म्हणून ढसाढसा रडता होता नवाजुद्दीन, ‘हे राम’चा हा किस्सा ठाऊक आहे का?

Nawazuddin Siddiqui : नवाजुद्दीन सिद्दीकी आज बॉलिवूडचा मोठा स्टार आहे. पण इथपर्यंतचा प्रवास सोपा खचितच नव्हता. एकेकाळी छोट्या मोठ्या रोलसाठीही त्याला अनेकांचे उंबरठे झिजवावे लागले. अनेकदा त्याचे रोल कट झालेत...

नवाजुद्दीन सिद्दीकी (Nawazuddin Siddiqui) आज बॉलिवूडचा मोठा स्टार आहे. पण इथपर्यंतचा प्रवास सोपा खचितच नव्हता. एकेकाळी छोट्या मोठ्या रोलसाठीही त्याला अनेकांचे उंबरठे झिजवावे लागले. अनेकदा त्याचे रोल कट झालेत. एकदा तर एक छोटाशा रोल कट झाला म्हणून नवाजुद्दीन ढसाढसा रडला होता. अर्थात हा रोलही खूप खास होता. या चित्रपटात खुद्द कमल हासन ( Kamal Haasan) सारख्या महानायकासोबत त्याला काम करण्याची संधी मिळाली होती.  हा किस्सा कदाचित तुम्हाला ठाऊक नसावा. 

नवाजुद्दीनने एका मुलाखतीत हा किस्सा सांगितला होता. हा किस्सा होता साऊथचे मेगास्टार कमल हासन यांच्या ‘हे राम’ (Hey Ram) या आयकॉनिक चित्रपटाचा. या चित्रपटासाठी नवाज ‘डायलॉग कोच’ म्हणून काम करत होता. कमल हासन या चित्रपटात मुख्य भूमिकेत होते. एक दिवस कमल हासन यांनी नवाजला ‘हे राम’ या चित्रपटात एक छोटीशी भूमिका दिली. नवाजचा तर विश्वास बसेना.  तो प्रचंड आनंदात होता. कारण ज्याला आदर्श मानतो अशा कमल हासन यांच्यासोबत काम करण्याची संधी त्याला मिळाली होती. एक-दोन मिनिटांचा हा रोल करताना नवाजचा आनंद गगनात मावेनासा झाला होता.

त्याने शॉट दिला...आता आपण कमल हासन यांच्या चित्रपटात दिसणार, हा आनंद वेगळाच होता. नवाज अगदी हवेत तरंगत होता. ज्याला त्याला सांगत सुटला होता. अगदी ‘हे राम’च्या प्रीमिअरला नवाजने आपल्या मित्रांनाही बोलवलं होतं. पण त्याच दिवशी खुद्द कमल हासन यांनीच त्याला अशी काही बातमी दिली की, नवाजला अश्रू अनावर झालेत.  

नवाज, तुझ्या मित्रांना सांग तुझा रोल कट झाला आहे, असं कमल हासन यांनी सांगितल्यावर नवाज अश्रू रोखू शकला नाही. त्यादिवशी नवाज अगदी ढसाढसा रडला होता. आपला रोल कट झाला, हे दु:ख तो पचवू शकला नव्हता. कमल हासन यांची मुलगी श्रुती हासने नवाजचं सांत्वन केलं होतं.