‘या’ सेलिब्रेटींनी हरवले कॅन्सरला

कॅन्सर हा शब्द जरी नुसता उच्चारला, तरी अंगावर काटे उभे राहतात. कॅन्सर झाला की मृत्यू अटळ, अशी काहीशी समजूत आजही

- Geetanjali Ambre -
कॅन्सर हा शब्द जरी नुसता उच्चारला, तरी अंगावर काटे उभे राहतात. कॅन्सर झाला की मृत्यू अटळ, अशी काहीशी समजूत आजही लोकांच्या मनात आहे. मात्र, हा रोग नेहमीच जीवघेणा असोतच, असे नाही. असे बरेच जण आहेत, ज्यांनी कॅन्सरशी दोन हात करून आयुष्यात पुन्हा दमदार पुनरागमन केले. आय़ुष्यात एखादी अप्रिय घटना घडली, की बस्स ! आता जगायचंच नाही, असा टोकाचा निर्णय काही जण घेतात... असा निर्णय घेण्यापूर्वी क्षणभर या व्यक्तींचे अनुभव ऐकावेत. ते त्यांच्यासाठी नक्कीच प्रेरणादायी ठरतील.


युवराजसिंग
भारताचा स्टार फलंदाज युवराज सिंग याला वर्ल्डकप २०११च्या आसपास कॅन्सर झाल्याची लक्षणे जाणवू लागली. कॅन्सरच्या पहिल्या स्टेजला असताना त्याला कॅन्सर झाल्याचे निदान झाले. याही परिस्थितीत तो डगमगला नाही. तो केमोथेरपी घेण्यासाठी अमेरिकेत गेला आणि २०१२च्या अखेरीस कॅन्सरवर मात करून त्याने क्रिकेटमध्ये पुनरागमन केले. कॅन्सरग्रस्त तसेच इतर लोकांना जिद्द देण्यासाठी युवीने ‘द टेस्ट आॅफ माय लाईफ’ हे पुस्तक लिहिले.

इम्रान हाश्मी
बॉलिवूड अभिनेता इम्रान हाश्मीचा मुलगा अयान याला वयाच्या अवघ्या चौथ्या वर्षी कॅन्सर झाल्याचे कळाले. हे ऐकून इम्रान आणि त्याची पत्नी परवीना यांच्या पायाखालची जमीन सरकली होती. मात्र, खचून न जाता इम्रानने या बलाढ्य रोगावर मात करून मुलाला त्यातून बाहेर काढले. यानंतर त्याने ‘द किस आॅफ लाईफ : हाऊ अ सुपर हिरो अँड माय सन डिफीटेड कॅन्सर’ हे पुस्तक लिहिले. या प्रवासातून एक गोष्ट निश्चित कळाली. कर्करोग हा अंत नाही तर इच्छाशक्तीने त्यावर मात करता येऊ शकते, असे इम्रान ‘लोकमत’ व ‘कोकिलाबेन धीरुभाई अंबानी हॉस्पिटल’च्या संयुक्त विद्यमाने आयोजित ‘एक जीवन, स्वस्थ जीवन’ या कार्यक्रमादरम्यान म्हणाला. तसेच कर्करोगाबाबत अनेक गैरसमज आहेत. ते दूर करायला हवेत. सर्वांत महत्त्वाचे म्हणजे समुपदेशनावर भर देण्याची गरज असल्याचे मतही त्याने या कार्यक्रमाद्वारे व्यक्त केले.

अनुराग बसू
‘बर्फी’ या चित्रपटानंतर अनुराग बसू प्रकाशझोतात आला. मात्र, फार कमी लोकांना माहिती आहे की, त्याने कॅन्सरसारख्या बलाढ्य आजाराशी दोन हात केले आहेत. २००४ मध्ये अनुरागची मुलगी ईशानाचा जन्म झाला. त्याच सुमारास तो ‘तुमसा नहीं देखा’ चित्रपटात बिझी होता. याच दरम्यान त्याला ब्लड कॅन्सर झाल्याचे कळाले. डॉक्टरांनी त्याला २ महिने जगशील, असे सांगितले होते. त्याने खंबीरपणे हे मान्य केले. मात्र, त्याने चित्रपटाचे चित्रीकरण थांबविले नाही. हॉस्पिटलच्या बेडवर बसून तो आपल्या टीमला सूचना देत होता. एवढ्यावरच तो थांबला नाही. त्याने ‘लाईफ इन अ मेट्रो’ आणि ‘गँगस्टर’ सारख्या चित्रपटांचे स्क्रिप्ट हॉस्पिटलमध्ये पूर्ण केले. ३ वर्षांच्या उपचारांनंतर अनुराग पूर्णपणे बरा झाला.

मनीषा कोईराला
९०च्या दशकातील बॉलिवूडमधली प्रसिद्ध अभिनेत्री म्हणजे मनीषा कोईराला. वयाच्या ४२व्या वर्षी तिला कॅन्सरचे निदान झाले. यानंतर ती उपचार घेण्यासाठी वर्षभर न्यूयॉर्कमध्ये होती. केमोथेरपीदरम्यान मनीषाचे केस गळून गेले होते. मात्र, याही परिस्थितीत तिने हार मानली नाही. तिने त्या गोष्टीचा सामना केला. वर्षभराच्या उपचारांनंतर ती बरी झाली. आता ती कर्करोगापासून मुक्त झाली आहे. पूर्ववत कामसुद्धा करू लागली आहे. तिने बॉलिवूडमध्येदेखील कमबॅक केले. कर्करोगाच्या रु ग्णांना आपले अनुभव सांगायला ती वेगवेगळ्या परिषदांमध्ये नेहमी सहभागी होते.