नजरेत क्रूरता, आवाजात निष्ठूरता.., 'संगीत मानापमान'मधील उपेंद्र लिमयेचं मोशन पोस्टर रिलीज

Upendra Limaye : अभिनेता उपेंद्र लिमयेच्या वाढदिवसानिमित्त 'संगीत मानापमान' चित्रपटातील त्याचा लूक रिलीज करण्यात आला आहे.

गेल्या काही दिवसांपासून अभिनेता सुबोध भावे (Subodh Bhave) चर्चेत आहे. ते म्हणजे त्याचा आगामी चित्रपट 'संगीत मानापमान' (Sangeet Manapman Movie) चित्रपटामुळे. या चित्रपटाची घोषणा झाल्यापासूनच प्रेक्षकांना उत्सुकता होती. या चित्रपटाच्या टीझरलाही प्रेक्षकांचा चांगला प्रतिसाद मिळाला आहे. त्यानंतर आता या चित्रपटातील उपेंद्र लिमयेच्या भूमिकेबद्दल खुलासा केला आहे.

अभिनेता उपेंद्र लिमयेच्या वाढदिवसानिमित्त संगीत मानापमान चित्रपटातील त्याचा लूक रिलीज करण्यात आला आहे. लूकचा पोस्टर रिलीज करत त्यांनी लिहिले की, नजरेत क्रूरता, आवाजात निष्ठूरता आणि कूटनीतीत तरबेज.. संगीत मानापमान चित्रपटातील कपटी खलनायक.. खुशालपूरनरेश धिरेन उपेंद्र लिमये यांचं हे मोशन पोस्टर... म्हणजे मानापमानच्या टीमतर्फे त्यांना वाढदिवसाची भेट. १० जानेवारी पासून तुमच्या जवळच्या चित्रपटगृहात! 

उपेंद्र लिमये संगीत मानापमान चित्रपटात निगेटिव्ह भूमिकेत पाहायला मिळणार आहे. त्याच्या या लूकला चाहत्यांची पसंती मिळताना दिसते आहे. चाहते या चित्रपटाच्या प्रदर्शनाची उत्सुकतेने वाट पाहत आहेत. या पोस्टरवर एका युजरने लिहिले की, खूपच छान पोस्टर. खलनायकाच्या भूमिकेत पाहायला आवडेल उपेंद्र सरांना.वाढदिवसाच्या अनेकानेक शुभेच्छा उपेंद्र लिमये सर. तर दुसऱ्या युजरने म्हटले की, या पोस्टरवरून सुद्धा त्यांच्या चेहऱ्यावरचे क्रूरतेचे भाव स्पष्ट जाणवत आहे......भारी अभिनय ..... वाढदिवसाच्या शुभेच्छा.

'संगीत मानापमान'बद्दल

'संगीत मानापमान' हा चित्रपट संगीतप्रेमींसाठी खऱ्या अर्थाने पर्वणी ठरणार आहे. शंकर एहसन लॉय यांनी या सिनेमाला संगीत दिले आहे. तर शंकर महादेवन, राहुल देशपांडे, महेश काळे, सावनी रविंद्र, प्रियांका बर्वे, आर्या आंबेकर या गायकांच्या स्वरांनी नटलेला हा चित्रपट आहे. या चित्रपटाचे दिग्दर्शन सुबोध भावेने केले आहे. नववर्षाच्या मुहुर्तावर १० जानेवारीला 'संगीत मानापमान' सर्वत्र प्रदर्शित होणार आहे.