अन्नदान ते रक्तदान शिबीर! चाहत्यांकडून सोनू सूदला मिळालं खास बर्थ डे गिफ्ट

Sonu sood: सोनूच्या चाहत्यांनी त्याचा वाढदिवस साजरा करण्यासाठी मोठ्या प्रमाणात रक्तदान मोहीम आयोजित केली आहे

कोविड काळात अनेकांसाठी देवदूत ठरलेला अभिनेता म्हणजे सोनू सूद (sonu sood). गेल्या काही वर्षापासून सोनू सूद सातत्याने गरजूंची मदत करत आहे. त्यामुळे आज तो अनेकांसाठी सुपरहिरो झाला आहे. पडद्यावर खलनायकाची भूमिका साकारणारा सोनू खऱ्या आयुष्यात अनेकांसाठी हिरो झाला. विशेष म्हणजे सातत्याने तो करत असलेल्या समाजकार्यामुळे आज तो अनेकांचा आदर्श झाला आहे. याचाच प्रत्यय नुकताच आला. सोनूच्या वाढदिवसानिमित्त त्याच्या चाहत्यांनी त्याला अनोखी भेट दिली. 

आज सोनू सूद त्याचा वाढदिवस साजरा करत आहे. त्यामुळे सोशल मीडियाच्या माध्यमातून अनेक जण त्याला शुभेच्छा देत आहेत. तर, काही जण प्रत्यक्ष भेटून त्याला विश करत आहेत. अनेक ठिकाणी त्याच्यासाठी अन्नदान, रक्तदान शिबीरं घेतली जात आहेत. सोनूच्या चाहत्यांनी त्याचा वाढदिवस साजरा करण्यासाठी मोठ्या प्रमाणात रक्तदान मोहीम आयोजित केली आहे. देशभरात तब्बल 800 ते 900 रक्तदान शिबिरे उभारण्यात आली आहेत. 

दरम्यान, सोनू सूदचे चाहते इथेच न थांबता रक्तदान मोहिमेव्यतिरिक्त काही वंचितांना अन्न दान करण्यासाठी कैक  मैल दूर जाणार आहेत. अभिनयाव्यतिरिक्त सोनूने त्याचं सामाजिक भान जपत अनेकांना मदत केली आहे. त्यामुळे त्याचा वाढदिवस चाहत्यांनी खास केला आहे. सोनू सूद लवकरच अॅक्शन-पॅक चित्रपट 'फतेह' या सिनेमात झळकणार आहे.