‘मी छोट्या पडद्यावरही झळकणार!’

‘वजह तुम हो’ या आगामी मर्डर मिस्ट्री सिनेमात दिलेल्या जबरदस्त इंटिमेंट सीन्समुळे अभिनेता गुरमित चौधरी सध्या जोरदार चर्चेत आहे. टीव्ही ते सिनेमा असा प्रवास केलेला गुरमित ‘खामोशिया’नंतर ‘वजह तुम हो’मध्ये मुख्य भूमिकेत दिसणार आहे. ‘रामायण’ या मालिकेमुळे लोकप्रिय झालेल्या गुरमितची बॉलिवूडवारी तशी खडतर समजली जात होती. कारण पहिल्याच ‘खामोशिया’ या चित्रपटाला अपयशाचा सामना करावा लागल्याने गुरमितला पुन्हा छोट्या पडद्यावर परतावे लागेल, अशी स्थिती निर्माण झाली होती. मात्र, ‘वजह तुम हो’मधून तो मुख्य भूमिकेत परतत असल्याने त्याच्या बॉलिवूड करिअरच्या आशा अजूनही जिवंत आहे, असेच म्हणावे लागेल. तसेच हा सिनेमा त्याचे पुढील करिअर ठरवेल, हेही तेवढेच खरे आहे. या सिनेमाच्या निमित्ताने त्याने ‘सीएनएक्स’शी साधलेला संवाद...


छोट्या
पडद्यावर तुला प्रेक्षकांनी स्वीकारले; मोठ्या पडद्यावरही स्वीकारतील का?
छोट्या पडद्यावर प्रेक्षकांचे मिळालेले प्रेम माझ्यासाठी मोलाचे आहे. त्यामुळे मोठ्या पडद्यावरही ते मला स्वीकारतील, असा मला विश्वास आहे. खरंतर ‘वजह तुम हो’ या सिनेमात सर्व मसाला आहे. चित्रपटांची गाणी आणि म्युझिक दर्जेदार आहे. मर्डर मिस्ट्री असल्याने अ‍ॅक्शनही भरपूर आहे. लव्ह-रोमांसही जबरदस्त आहे. त्यामुळे हा सिनेमा म्हणजे एक परिपूर्ण पॅकेज असल्याने प्रेक्षकांना तो नक्कीच भावेल. ज्या पद्धतीने सिनेमाच्या प्रमोज्ला प्रेक्षकांचा प्रतिसाद मिळत आहे, त्यावरून प्रेक्षक माझा स्वीकार करतील, असा मला विश्वास आहे.


इंटिमेंट सीन्समुळे सिनेमाच्या ट्रेलरने धूम उडवून दिली आहे, तू किती एक्साइटेड आहेस?
मी अगोदरच स्पष्ट करतो, की हल्ली चित्रपटात इंटिमेंट सीन्स देणे कॉमन बाब झाली आहे. त्यामुळे याकडे एका विशिष्ट नजरेने बघण्याची गरज नाही. ‘वजह तुम हो’ हा फुल मसाला असलेला सिनेमा आहे. लव्ह, रोमांस, अ‍ॅक्शन, सस्पेन्स, गाणी असे सगळे काही या सिनेमात आहे. सिनेमाच्या ट्रेलरने धूम उडवून दिली, हेही तितकेच खरे आहे. यू-ट्यूबवर आतापर्यंत एक कोटीपेक्षा अधिक हिट्स मिळाल्या आहेत. त्यामुळे मी खूप एक्साइटेड आहे. सिनेमाच्या प्रमोशनसाठी जेव्हा मी बाहेर पडलो तेव्हा मला यू-ट्यूब बघण्याचा सल्ला दिला होता. जेव्हा मी यू-ट्यूब बघितले तेव्हा मी अवाकच झालो. कारण एक कोटींपेक्षा अधिक लोकांनी चित्रपटाचा ट्रेलर बघितला आहे.
टीव्ही किंवा रिअ‍ॅलिटी शोमध्ये तुला परतायला आवडेल का?
मी कधीही टीव्ही किंवा रिअ‍ॅलिटी शोपासून दूर जाण्याचा विचार करीत नाही. अजूनही मी काही टीव्ही शोवर काम करीत आहे. रिअ‍ॅलिटी शोबद्दल बोलायचे झाल्यास ‘झलक दिखला जा’ या शोने मला खूप प्रेम दिले. त्यामुळे मी आजही रिअ‍ॅलिटी शोविषयी प्रभावित आहे. सध्या मी बॉलिवूडवर लक्ष केंद्रित करून असलो, तरी टीव्हीपासून दूर आहे, असे अजिबात नाही. मी आजही काही प्रोजेक्टवर काम करीत आहे.
भविष्यात रियल पार्टनरसोबत तुला पडद्यावर रोमांस करायला आवडेल का?
होय, देबिना खूपच गुणी कलाकार आहे. त्यामुळे तिच्यासोबत पडद्यावर रोमांस करायला मला नक्कीच आवडेल. ‘खामोशिया’मध्ये तिची छोटीशी भूमिका होती. त्यामुळे मोठ्या पडद्यावर आम्ही यापूर्वीच एकत्र आलो आहोत. आता मुख्य भूमिकेत एकत्र येण्याच्या संधीत आम्ही आहोत.
तुझ्याकडे चित्रपटांचे आणखी काही प्रोजेक्ट आहेत का?
‘वजह तुम हो’ सिनेमाचा ट्रेलर बघून सध्या मला कॉल येत आहेत. त्यामुळे माझ्याकडे किती प्रोजेक्ट आहेत, हे येत्या काळात सांगायला मला आवडेल. सिनेमाच्या प्रमोशनसाठी एक महिनाच असल्याने मी प्रमोशनवरच लक्ष केंद्रित करून आहे. जेव्हा सिनेमा रिलीज होईल, तेव्हा कदाचित वेगळे चित्र असेल. कारण बॉलिवूडमध्ये टॅलेंटला संधी आहे, हे मी जाणून आहे. त्यामुळे भविष्यात माझ्याकडे काही प्रोजेक्ट नक्कीच असतील, यावर मला विश्वास आहे.