जबरा फॅन

कोट्यवधी फॅन्सची संख्या असलेल्या कित्येक बॉलिवूड स्टार्सनी हॉलिवूडच्या धर्तीवरसुद्धा स्वत:ची कीर्ती निर्माण केली आहे. त्यामुळेच आज हॉलिवूडमध्ये सर्वोच्च शिखरावर असलेले काही स्टार बॉलिवूड स्टार्सच्या प्रेमात पडले आहेत. याची प्रचिती नुकतीच आपल्याला बघावयास मिळाली. गेल्या रविवारी हॉलिवूडचा सुपरस्टार ‘मेन इन ब्लॅक’ अर्थात विल स्मिथ बॉलिवूडचा खिलाडी अक्षय कुमार याच्यावरील प्रेमापोटी चक्क त्याने आयोजित केलेल्या ‘रुस्तम’च्या सक्सेस पार्टीत सहभागी झाला. या वेळी त्याने पार्टी खूप एन्जॉय केली. पार्टीत टिष्ट्वंकल खन्ना, वरुण धवन, जॅकलिन फर्नांडिज, रणबीर कपूर, करण जोहर, रोहित धवन, श्रद्धा कपूर, आलिया भट्ट, अर्जुन कपूर आणि सोनाक्षी सिन्हा यांच्यासोबत त्याने फोटोेसेशनही केले. बॉलिवूड स्टार्सच्या पार्टीत विल स्मिथची ही अचानकची एंट्री अनेकांना आश्चर्यचकित करणारी होती. त्याचबरोबर हॉलिवूड स्टार्सचे बॉलिवूड स्टार्सवरील प्रेम हेही अधोरेखित झाले. बरेचसे असे हॉलिवूड कलाकार आहेत, जे बॉलिवूडकरांच्या ‘जबरा फॅन्स’च्या यादीत आहेत.

पीपल्स चॉइस प्रियांका चोप्रा
बॉलिवूडपाठोपाठ हॉलिवूडमध्येही स्वत:ची ओळख निर्माण करीत असलेल्या प्रियांका चोप्रा हिच्या विदेशी फॅन्सच्या संख्येत झपाट्याने वाढ होत आहे. पीपल्स चॉइस अ‍ॅवॉर्ड मिळविलेल्या प्रियांकाचे हॉलिवूड स्टार्सदेखील चाहते आहेत. ‘बेवॉच’ या चित्रपटात खलनायिकेची भूमिका साकारत असलेल्या प्रियांकाच्या फॅन्सच्या यादीत याच चित्रपटात मुख्य भूमिकेत असलेला ड्वेन जॉनसन ऊर्फ द रॉक हा जबरा फॅन आहे. मध्यंतरी त्याने प्रियांका ही खूप चांगली अभिनेत्री असून, ती माझ्या बहिणीसारखी असल्याचे म्हटले होते. त्याचबरोबर हॉलिवूडमध्ये चॉकलेट इमेज असलेला रयान रेनॉल्ड्स हादेखील प्रियांकाचा जबरी फॅन आहे. तो तिच्या कामाच्या पद्धतीवर फिदा असल्याचे त्याने नुकतेच जाहीरपणे सांगितले.

डिंपल गर्लवर ब्रॅड पिट फिदा
‘ट्रिपल एक्स : द रिटर्न आॅफ झेंडर केज’ या चित्रपटातून सुपरस्टार विन डिजल याच्यासोबत डेब्यू करीत असलेली डिंपल गर्ल दीपिका पादुकोन हॉलिवूड सुपरस्टार ब्रॅड पिट याची जबरदस्त फॅन आहे. ब्रॅड पिटसोबतची भेट स्वप्नवत वाटणाऱ्या दीपिकाला धक्का तेव्हा बसला, जेव्हा ब्रॅड पिटनेच म्हटले होते की मी, दीपिकाचा जबरदस्त फॅन आहे. ट्रिपल एक्स चित्रपटामुळे चर्चेत आलेल्या दीपिकाबाबत ब्रॅड पिटला जेव्हा विचारण्यात आले होते, तेव्हा त्याने अशाप्रकारचे वक्तव्य केले होते. ब्रॅडच्या या वक्तव्यामुळे दीपिका सध्या सातव्या आसमानपर आहे, हे नक्की.

शाहरूखची अदा हॉलीवूड फिदा
किंग खान शाहरुखचे भारतातच नव्हे, तर जगभरात चाहते आहेत. त्यामुळेच शाहरुख जगाच्या कुठल्याही कानाकोपऱ्यात गेल्यास त्याची फॅन्समधील क्रेझ बघावयास मिळते. बरेचसे हॉलिवूड स्टार्सदेखील शाहरुखच्या अ‍ॅक्शनवर फिदा आहेत. त्यामध्ये अग्रस्थानी आहे ती, ट्वाइलाइटची अभिनेत्री क्रिस्टीन स्ट्रीवर्ट. क्रिस्टीनला शाहरुखसोबत रोमान्स करायचा आहे. शाहरुखला तिने ‘एपिटोम आॅफ रोमान्स’ अशी उपाधी दिली आहे. क्रिस्टीननंतर दुसऱ्या स्थानावर आहे ती, हॉलिवूडची हॉट अ‍ॅक्ट्रेस पेनलोप क्रूझ, कारण, ती शाहरुखची डाय हार्ट फॅन आहे. नुकतेच एका मुलाखतीत तिने म्हटले होते की, जर शाहरुखसोबत चित्रपटात काम करण्याची संधी मिळाली, तर तो माझ्या करिअरमधील सर्वोच्च क्षण असेल. तसेच, मला संधी मिळाल्यास मी शाहरुखप्रतीचे माझे प्रेम जगजाहीर करेन, असेही तिने म्हटले होते. त्याचबरोबर रिअ‍ॅलिटी टीव्ही स्टार किम कर्दाशियनदेखील शाहरुखची जबरा फॅन आहे.

आॅस्कर विजेता महानायकाचा फॅन
आॅस्कर अ‍ॅवॉर्ड विजेता लियोनार्डो डिकॅप्रियो बॉलिवूडचे महानायक अमिताभ बच्चन यांचा जबरदस्त फॅन आहे. डिकॅप्रियो आणि अमिताभने ‘द ग्रेट गॅट्सबाय’ या चित्रपटात एकत्र काम केले होते. त्याच्या मते अमिताभ हा अतिशय प्रतिभावान आणि सभ्य व्यक्ती आहे. त्यांच्यासोबत काम करणे हे माझ्यादृष्टीने भाग्याची गोष्ट आहे. भविष्यात त्यांच्यासोबत मी आणखी काही चित्रपटांमध्ये काम करू इच्छितो, अशी इच्छाही त्याने जाहीरपणे बोलून दाखविली आहे. अमिताभच्या व्यक्तिमत्त्वाने डिकॅप्रियो खूपच प्रभावित आहे.

धकधक गर्लचाही डाय हार्ट फॅन
बॉलिवूडची धकधक गर्ल असलेल्या माधुरी दीक्षितचा हॉलिवूड स्टार ब्रेडली कूपर डाय हार्ट फॅन आहे. महानायक अमिताभ बच्चन यांच्यासह किंग खान, सलमान खान यासारख्या बड्या स्टारसोबत हिट चित्रपट दिलेल्या माधुरीसोबत काम करण्याची संधी मिळावी, असे कूपर याने बऱ्याचदा जाहीरपणे बोलून दाखविले आहे. त्याचबरोबर माधुरीलादेखील कूूपरबरोबर काम करण्याची इच्छा आहे. जेव्हा तिला हॉलिवूडमधील तिला आवडत असलेल्या सुपरस्टारबाबत विचारण्यात आले तेव्हा तिने क्षणाचाही विलंब न करता ब्रेडली कूपर याचे नाव घेतले. जर मला त्याच्यासोबत काम करण्याची संधी मिळाली, तर मी माझे भाग्यच समजेल असेही तिने म्हटले होते.

- satish.dongare@gmail.com