कंगना रणौतने चक्क आर्यन खानचं केलं कौतुक; म्हणाली, "फिल्मी कुटुंबातून येऊनही..."

शाहरुखच्या मुलावर कंगना रणौतने उधळली स्तुतीसुमनं

शाहरुख खानचा लाडका लेक आर्यन खान (Aryan Khan) लवकरच बॉलिवूडमध्ये पदार्पण करत आहे. मात्र त्याने करिअरमध्ये वेगळी वाट निवडली आहे. इतर स्टारकिडप्रमाणे तो हिरो बनायला आलेला नाही तर त्याने दिग्दर्शनात पाऊल ठेवले आहे.  त्याने दिग्दर्शित केलेली पहिली सीरिज नेटफ्लिक्सवर प्रदर्शित होणार आहे. नेहमी स्टारकिड्सवर टीका करणाऱ्या अभिनेत्री आणि खासदार कंगना रणौतने (Kangana Ranaut) मात्र यावेळी आर्यन खानचं कौतुक केलं आहे. काय म्हणाली कंगना? वाचा

नेपोटिझमवरुन नेहमी स्टार कलाकारांना लक्ष्य करणाऱ्या कंगनाने यावेळी आर्यन खानचं मात्र कौतुक केलं आहे. कंगना रणौतने इन्स्टाग्रामवर स्टोरी शेअर करत लिहिले, "फिल्म कुटुंबातील मुलं पदार्पण करताना नुसतं मेकअप लावून, वजन कमी करुन, बाहुली बनून स्वत:ला हिरो हिरोईन समजत असतात. भारतीय सिनेमाचा स्तर उंचवण्यासाठी सर्वांनी एकत्र आलं पाहिजे हे आता गरजेचं आहे. ज्यांना सहज फिल्म इंडस्ट्रीत येता येतं ते बरेचदा सोपी वाटच निवडतात. पण आपल्याला कॅमेऱ्यामागेही काही लोकांची गरज आहे. आर्यन खानने असा मार्ग निवडला आहे जो खूप कमी लोक निवडतात हे पाहून बरं वाटलं. त्याच्या लेखक आणि फिल्ममेकर म्हणून पदार्पणासाकडे लक्ष लागलं आहे."

आर्यन खान त्याच्या होम प्रोडक्शन रेड चिलीज एंटरटेनमेंट बॅनरखाली बनत असलेल्या वेब सीरिजच्या तयारीत व्यस्त आहे. या मालिकेतून आर्यन दिग्दर्शक म्हणून बॉलिवूडमध्ये पदार्पण करणार आहे. नुकतंच नेटफ्लिक्स इंडियाने लेटेस्ट पोस्ट शेअर केली आहे. ज्यामध्ये आर्यनच्या सीरिजबाबत महत्त्वाची माहिती देण्यात आली आहे. नेटफ्लिक्सने आपल्या पोस्टमध्ये लिहिले की, "नेटफ्लिक्सने रेड चिलीज एंटरटेनमेंटशी हातमिळवणी केली आहे आणि आम्ही दोघे लवकरच एक वेबसीरिज घेऊन येत आहोत, जी गौरी खान निर्मित आणि आर्यन खान दिग्दर्शित करणार आहे."

हा अभिनेता दिसेल आर्यनच्या सीरिजमध्ये

आर्यन खानच्या या वेब सीरिजचे नाव स्टारडम मानले जात आहे. मात्र, त्याची अधिकृत घोषणा अद्याप व्हायची आहे. ९०च्या दशकाचा सुपरस्टार बॉबी देओल आर्यनच्या डेब्यू मालिकेत महत्त्वाची भूमिका साकारताना दिसणार आहे. निर्माता करण जोहरच्या चॅट शो कॉफी विथ करणच्या सीझन ८मध्ये, बॉबीने खुलासा केला होता की तो रेड चिलीज एंटरटेनमेंटच्या बॅनरखाली बनत असलेल्या सीरिजमध्ये काम करत आहे, ज्याचा दिग्दर्शक दुसरा कोणीही नाही तर हा आर्यन खान आहे.