करण जोहरने ‘कुछ कुछ होता है’च्या रिमेकसाठी निवडली स्टारकास्ट!!

सुपरहिट चित्रपट म्हटल्यावर त्याच्या रिमेकची म्हणा, सीक्वलची म्हणा चर्चा होणारचं. त्यानुसार आता ‘कुछ कुछ होता है’च्या रिमेकचीही चर्चा सुरू झाली आहे.

आजपासून २० वर्षांपूर्वी करण जोहरचा ‘कुछ कुछ होता है’ हा चित्रपट प्रदर्शित झाला होता. या चित्रपटाचे बॉक्सआॅफिसवरचे प्रदर्शनही शानदार होते. करणने दिग्दर्शित केलेला हा सुपरहिट चित्रपट आजही प्रेक्षक विसरू शकलेले नाहीत. आता सुपरहिट चित्रपट म्हटल्यावर त्याच्या रिमेकची म्हणा, सीक्वलची म्हणा चर्चा होणारचं. त्यानुसार आता ‘कुछ कुछ होता है’च्या रिमेकचीही चर्चा सुरू झाली आहे. केवळ चर्चाचं नाही तर करणने हा प्रोजेक्ट मनावर घेतल्याचेही संकेत आहेत.

होय, अलीकडे करणने याबाबतचे सकारात्मक संकेत दिलेत. केवळ इतकेच नाही तर या रिमेकच्या स्टारकास्टबद्दलही त्याने खुलासा केला. मी ‘कुछ कुछ होता है’चा रिमेक बनवलाच तर त्यात रणबीर कपूर, आलिया भट्ट आणि जान्हवी कपूर यांना कास्ट करणार, असे करण एका प्रश्नाच्या उत्तरादाखल म्हणाला. आता ‘कुछ कुछ होता है’चा रिमेक आणि इतकी लोकप्रीय स्टारकास्ट म्हटल्यानंतर हा चित्रपट कधी बनणार, असा प्रश्न अनेकांना पडला असेल.  या प्रश्नाचे उत्तर तूर्तास तरी आमच्याकडे नाही. पण करणने मनावर घेतलेच आहे म्हटल्यावर आणि स्टारकास्टही तयार आहे म्हटल्यावर यासाठी फार प्रतीक्षा करावी लागणार नाही, एवढे मात्र आम्ही खात्रीने सांगू शकतो.
१९९८ मध्ये ‘कुछ कुछ होता है’ याच चित्रपटापासून करण जोहरने दिग्दर्शनास सुरूवात केली होती. या चित्रपटात शाहरूख खान, काजोल आणि राणी मुखर्जी लीड रोलमध्ये होते.
जान्हवी कपूरने अलीकडे करणच्याच ‘धडक’ या चित्रपटातून बॉलिवूड डेब्यू केला. आलिया भट्टचा डेब्यूही करणच्याच ‘स्टुडंट आॅफ द ईअर’मधून झाला होता. या दोघीही करणच्या आवडत्या ‘स्टुडंट’ आहेत. उरला रणबीर कपूर तर तो तर करणचा आॅल टाईम फेवरेट हिरो आहे.