'खिचड़ी' फेम पुनीत तलरेजावर प्राणघातक हल्ला; गंभीर जखमी झाल्यामुळे अभिनेता रुग्णालयात दाखल

Punit talreja: औषधे खरेदी करण्यासाठी गेलेल्या पुनीतवर काही अज्ञातांनी हल्ला केला.

छोट्या पडद्यावरील लोकप्रिय अभिनेता पुनीत तलरेजा (Punit Talreja) याच्यावर प्राणघातक हल्ला करण्यात आला आहे. अंबरनाथ येथे पुनीतवर हल्ला करण्यात आला असून यात तो गंभीर जखमी झाला आहे. सध्या त्याला रुग्णालयात उपचारांसाठी दाखल करण्यात आलं असून पोलीस याप्रकरणी तपास करत आहेत.

पोलिसांनी दिलेल्या माहितीनुसार, पुनीत अंबरनाथमधील एका औषधांच्या दुकानात खरेदीसाठी गेला होता. औषधे खरेदी केल्यानंतर पुनीत परतत असताना काही अज्ञात हल्लेखोरांनी त्याच्यावर हल्ला केला. सुरुवातीला शिवीगाळ करत या हल्लेखोरांनी वाद घालण्यास सुरुवात केली त्यानंतर त्यांनी त्याच्यावर लोखंडी रॉड व अन्य शस्त्रांनी वार केला. यात पुनीत गंभीर जखमी झाला आहे.

दरम्यान, या प्रकरणी अंबरनाथमधील शिवाजी नगर पोलिस ठाण्यात गुन्हा नोंद करण्यात आला आहे. घटनास्थळावर पुनीत गंभीर जखमी झाल्यानंतर तेथे उपस्थित असलेल्या काही लोकांनी त्याला तात्काळ रुग्णालयात दाखल केलं.  या प्रकरणी सध्या तपास सुरु असून पोलीस अज्ञात हल्लेखोरांचा शोध घेत आहेत. पुनीत छोट्या पडद्यावरील लोकप्रिय अभिनेता आहे. त्याने खिचडी या गाजलेल्या मालिकेत काम केलं आहे.