'महाराष्ट्राची हास्यजत्रा' फेम गौरव मोरेने शाहरुख खानला दिल्या वाढदिवसाच्या शुभेच्छा, म्हणाला- "मी तुमचा जबरा फॅन..."

Gaurav More : शाहरुख खान यावर्षी त्याचा ५९वा वाढदिवस साजरा करत आहे. त्याच्या वाढदिवसानिमित्त अभिनेता गौरव मोरेने खास पोस्ट शेअर केली आहे.

छोट्या पडद्यावरील लोकप्रिय कॉमेडी शो 'महाराष्ट्राची हास्यजत्रा'मधून (Maharashtrachi Hasyajatra) अभिनेता गौरव मोरे (Gaurav More) घराघरात पोहचला. फिल्टर पाड्याचा बच्चन या नावाने लोकप्रिय असलेल्या गौरवने छोट्या पडद्यासह रुपेरी पडदाही गाजवला आहे. गौरव मोरे सोशल मीडियावर सक्रीय आहे आणि तो पोस्टच्या माध्यमातून चाहत्यांना अपडेट देत असतो. आता त्याने बॉलिवूडचा बादशाह शाहरुख खान(Shah Rukh Khan)च्या वाढदिवसानिमित्त खास पोस्ट शेअर केली आहे.

शाहरुख खान यावर्षी त्याचा ५९वा वाढदिवस साजरा करत आहे. आज म्हणजेच २ नोव्हेंबरला किंग खानचा वाढदिवस आहे आणि त्याचे चाहते त्याला वाढदिवसाच्या शुभेच्छा देताना दिसत आहे. या चाहत्यांमध्ये गौरव मोरेचाही समावेश आहे. स्वतः त्याने सोशल मीडियावर व्हिडीओ शेअर करत याबद्दल सांगितले आहे. तोदेखील चाहत्यांप्रमाणे किंग खानच्या बंगल्याबाहेर थांबून अभिनेत्याची झलक पाहण्यासाठी जायचा.

किंग खानला दिल्या शुभेच्छा

गौरव मोरेने शाहरुख खानचा बंगला मन्नतच्या बाहेरचा व्हिडीओ शेअर केला आहे, ज्यात किंग खान आपल्या चाहत्यांना भेटण्यासाठी गॅलरीत आलेला दिसतो आहे. त्याने हा व्हिडीओ शेअर करत लिहिले की, व्हिडीओ जुना आहे.पण क्रेझ कायम आहे आणि हो व्हिडीओ मी स्वतः काढलाय कारण मी सुद्धा तुमचा जबरा फॅन आहे. आज तुमचा वाढदिवस तुम्हाला वाढदिवसाच्या खुप खुप शुभेच्छा.

वर्कफ्रंट
गौरव मोरे काही दिवसांपूर्वी सोनी वाहिनीवरील 'मॅडनेस मचायेंगे' शोमधून प्रेक्षकांच्या भेटीला आला. 'मॅडनेस मचायेंगे' हा शो संपला आहे. 'मॅडनेस मचायेंगे'मध्ये एन्ट्री घेण्याआधी गौरवने 'महाराष्ट्राची हास्यजत्रा' हा शो सोडला होता. आता पुन्हा गौरव 'महाराष्ट्राची हास्यजत्रा'मध्ये परतणार की कलर्स मराठी वाहिनीवर सुरू झालेल्या 'हसताय ना? हसायलाच पाहिजे' या कार्यक्रमात एन्ट्री घेणार, असा प्रश्न सर्वांना पडला आहे. तो कोणत्या कार्यक्रमात दिसणार हे येत्या दिवसात स्पष्ट होईल.