सातव्या मुलीची सातवी मुलगी: दमदार भूमिकेत ऐश्वर्या नारकर; अजिंक्य ननावरेही साकारणार महत्त्वपूर्ण भूमिका

Satvya Mulichi Satavi Mulagi: मालिकेत हे कलाकार नेमकी कोणती भूमिका साकारणार हे अद्याप गुलदस्त्यात आहे. त्यामुळे आता त्यांच्या भूमिकेविषयी जाणून घेण्याची प्रेक्षकांमध्ये उत्सुकता निर्माण झाली आहे.

सध्या झी मराठीवर अनेक नवनवीन मालिका बाळसं धरत असल्याचं पाहायला मिळत आहे. आतापर्यंत अनेक नवीन मालिका प्रेक्षकांच्या भेटीला आल्या असून यामध्येच आता ‘सातव्या मुलीची सातवी मुलगी’ (Satvya Mulichi Satavi Mulagi ) ही नवीन मालिका लवकरच प्रेक्षकांच्या भेटीला येणार आहे. सध्या या मालिकेचे अनेक प्रोमो व्हायरल झाले असून त्यातील कलाकारांवरील पडदाही दूर होताना दिसत आहे. यामध्येच आता या मालिकेत अभिनेत्री ऐश्वर्या नारकर (Aishwarya Narkar) आणि अजिंक्य ननावरे (ajinkya nanaware) महत्त्वपूर्ण भूमिका साकारणार असल्यांच सांगण्यात येतं.

सध्या सोशल मीडियावर या मालिकेचं एक पोस्टर व्हायरल होत आहे. या पोस्टरमध्ये अभिनेत्री ऐश्वर्या नारकर आणि अजिंक्य ननावरे लवकरच सातव्या मुलीची सातवी मुलगी या मालिकेत झळकणार असल्याचं सांगण्यात येत आहे. या मालिकेत हे कलाकार नेमकी कोणती भूमिका साकारणार हे अद्याप गुलदस्त्यात आहे. त्यामुळे आता त्यांच्या भूमिकेविषयी जाणून घेण्याची प्रेक्षकांमध्ये उत्सुकता निर्माण झाली आहे.

दरम्यान, या मालिकेत अभिनेत्री तितिक्षा तावडे (Titeeksha Tawde) मुख्य भूमिकेत झळकणार आहे.  या मालिकेतील तितिक्षा, नेत्राची भूमिका साकारत आहे. नेत्रा ही गावातील एक सामान्य मुलगी. पण तिला असामान्य देणगी मिळाली असते. या नेत्राला त्रिनयना या देवीने भविष्य पाहू शकण्याचं वरदान दिलेलं असतं. नेत्रा दिव्यशक्तीच्या आधारे भविष्य पाहू शकते. या दिव्य शक्तीचा वापर तिला लोकांच्या भल्यासाठी करायचा आहे. पण हे करत असताना तिला अनेक संकटाचा सामना करावा लागतो. भविष्यात काय होणार, हे जाणणा-या नेत्राला तिला वाईट समजलं जातं, असं या मालिकेचं कथानक असल्याचं कळतंय. ही मालिका एका बंगाली मालिकेचा रिमेक असून येत्या १२ सप्टेंबरपासून रात्री  १०. ३० वाजता प्रेक्षकांच्या भेटीला येणार आहे.