बदलापूर अत्याचार प्रकरण: अक्षय शिंदे एन्काऊंटरवर मराठी अभिनत्रीने मांडली रोखठोक भूमिका!

Akshay Shinde Encounter:  बदलापूर येथील नामांकित शाळेतील दोन चिमुरड्या विद्यार्थिनींवर झालेल्या अत्याचार प्रकरणातील आरोपी अक्षय शिंदे याला सोमवारी सायंकाळी पोलीस चकमकीत ठार करण्यात आले. संध्याकाळी अक्षयला तळोजा जेलमधून बदलापूरच्या दिशेने ट्रान्सिट रिमांडसाठी घेऊन जात होते. त्याच वेळी आरोपी अक्षय शिंदेने पोलिसाच्या हातून बंदूक हिसकावून घेतली आणि एपीआय निलेश मोरे यांच्यावर गोळी झाडली. निलेश मोरेंच्या पायाला गोळी लागली. पोलिसांनी स्वसंरक्षणासाठी गोळीबार केला, त्यात अक्षय शिंदेचा एन्काऊंटर झाला. या घटनेबाबत विविध प्रतिक्रिया येत आहेत. यावर मराठी अभिनेत्रीने पोस्ट शेअर केली आहे. 

अक्षय शिंदेचा एन्काऊंटर प्रकरणी विविध राजकीय पक्षांचे अनेक राजकारणी, नेतेमंडळी आपापल्या पद्धतीने भूमिका मांडत आहेत. काहींनी एन्काउंटरच्या निमित्ताने सरकारला कोंडीत पकडण्याचेही प्रयत्न केलेत. तर काहींनी अक्षय शिंदे एन्काऊंटर झाल्याने पीडितेला न्याय मिळाला, असे म्हणत सरकारचे कौतुक केले आहे. याविषीय अनेक तर्कवितर्क लढवले जातील. अशातच मराठी अभिनेत्री विदिशा म्हसकरने (vidisha maskar) सोशल मीडियावर एक पोस्ट शेअर केली आहे.  मुख्यंत्री एकनाथ शिंदे यांचं नागरिकांकडून होणाऱ्या कौतुकाची एक बातमी विदिशाने शेअर केली आहे. कॅप्शनमध्ये तिने "खऱ्या आयुष्यातील सिंबा, सिंघम स्टोरी", असं म्हटलं. 

विदिशा म्हसकर ही एक लोकप्रिय अभिनेत्री आहे. तिने 'रंग माझा वेगळा', 'हे मन बावरे', '३६ गुणी जोडी', 'भाग्य दिले तू मला' अशा मालिकेत काम केलं. सोशल मीडियावर ती सक्रीय असते आणि विविध विषयांवर आपले स्पष्ट मत मांडताना ती पाहायला मिळते.  मालिकेच्या माध्यमातून घराघरात पोहोचलेल्या विदिशाला नवनवीन ठिकाणांना भेट द्यायला प्रचंड आवडतं. यात खासकरुन एकटीने प्रवास करणं, नवीन ठिकाणं एक्सप्लोअर करणं हा तिचा आवडीचा विषय  त्यामुळे ती बऱ्याचदा तिची बॅग उचलते आणि एकटीच फिरायला निघते.