'गारवा...'नंतर मिलिंद इंगळे व सौमित्र यांचा नवा अल्बम 'तिला सांगा कुणी'

मिलिंद इंगळे व सौमित्र यांचा पाऊस गाण्यांचा अल्बम 'गारवा...' या सदाबहार अल्बमला यंदा वीस वर्षे पूर्ण झाली आहेत. या निमित्ताने मिलिंद व सौमित्र रसिकांसाठी पावसावर एक नवीन गाणे घेऊन आले आहेत.

ठळक मुद्दे 'तिला सांगा कुणी'ला मिळतोय चांगला प्रतिसाद'तिला सांगा कुणी' गाण्याला स्वरसाज दिला मिलिंद इंगळेंनी

पाऊस म्हटले की आठवतो तो मिलिंद इंगळे व सौमित्र यांचा पाऊस गाण्यांचा अल्बम 'गारवा...'. या सदाबहार अल्बमला यंदा वीस वर्षे पूर्ण झाली आहेत. या निमित्ताने मिलिंद व सौमित्र रसिकांसाठी पावसावर एक नवीन गाणे घेऊन आले आहेत. ही गझल असून 'तिला सांगा कुणी' असे त्याचे नाव आहे. हे गाणे नुकतेच प्रकाशित करण्यात आले आहे व या गाण्याला उत्तम प्रतिसाद मिळतो आहे.
'तिला सांगा कुणी' या गाण्याच्या म्युझिक व्हिडिओचे चित्रीकरण इगतपुरी येथील निसर्गरम्य अशा ड्रमस्टिक लगून रिसॉर्ट आणि त्याच्या आजूबाजूच्या परिसरात करण्यात आले आहे. या व्हिडिओत मिलिंद इंगळे यांच्यासोबत सहनायिका म्हणून तुझं माझं ब्रेकअप मालिकेतून घराघरात पोहचलेली अभिनेत्री मीरा जोशी दिसणार आहे. सध्या या व्हिडिओला नाइन एक्स झक्कास, मायबोली या वाहिनींवर तसेच फेसबुक, युट्यूब व इतर डिजिटल माध्यमांवर खूप चांगला प्रतिसाद मिळतो आहे.

या गाण्याबाबत सांगताना अभिनेत्री मीरा जोशी म्हणाली की, 'पावसातील हे माझे पहिलेच  गाणे आहे. आतापर्यंत मी केलेल्या गाण्यापेक्षा हे खूप वेगळे गाणे आहे. लहानपणी गारवाची गाणी ऐकली होती. मला त्यातली सर्व गाणी खूप आवडतात. त्यावेळी सिनेइंडस्ट्रीशी काहीच संबंध नव्हता. माझ्याकडे गारवाची कॅसेटदेखील होती. स्वप्नातही कधी वाटले नव्हते की  एक दिवस मी मिलिंद इंगळेंसोबत काम करण्याचा योग येईल. 'तिला सांगा कुणी' या गाण्याच्या निमित्ताने हा योग जुळून आला.'
मिलिंद व सौमित्र यांच्या नवीन कलाकृतीची वाट पाहणाऱ्या चाहत्यांसाठी तिला सांगा कुणी हे गाणे नक्कीच कर्णमधुर व नेत्रसुखद मेजवानी ठरणार आहे. या व्हिडिओची निर्मिती इनरव्हॉइस प्रोडक्शन प्रा. लि, .यांनी केले आहे आणि दिग्दर्शन निलेश कुंजिर यांनी केले आहे.