अशोक सराफ यांच्या हृदयात समथिंग समथिंग सिनेमाचा ट्रेलर तुम्ही पाहिला का?

‘हृदयात समथिंग समथिंग’ या चित्रपटात अशोक सराफ यांच्यासोबतच अनिकेत विश्वासराव, स्नेहा चव्हाण, भुषण कडू, प्रियंका यादव यांच्या मुख्य भूमिका असून हा चित्रपट ५ ऑक्टोबर २०१८ ला रिलीज होणार आहे.

प्रविण राजा कारळे दिग्दर्शित हृदयात समथिंग समथिंग सिनेमाचा ट्रेलर लाँच मुंबईत एका शानदार सोहळ्यात करण्यात आला. यावेळी सिनेमाचे कलाकार अनिकेत विश्वासराव, स्नेहा चव्हाण, भुषण कडू, प्रियंका यादव आणि अशोक सराफ यांच्यासह सिनेमाची म्युझिक टिमही उपस्थित होती.

यावेळी सिनेमाचे निर्माते विनोदकुमार जैन म्हणाले, "माझी ही पहिली निर्मिती आहे. सिनेमा बनवण्याचे स्वप्न मी कित्येक वर्षांपासून पाहत होतो. एक निखळ मनोरंजन करणाऱ्या कौटुंबिक विनोदी सिनेमाची निर्मिती करावी असं वाटतं होतं. मग मी आणि शैलेंद्र पारख, स्वप्नील चव्हाण, अतुल गुगळे या माझ्या तीन मित्रांनी मिळून हृदयात समथिंग समथिंग या सिनेमाची निर्मिती केली. आता या सिनेमाच्या गाण्यांना मिळणाऱ्या प्रतिसादावरून आम्ही केलेल्या मेहनतीचे फळ मिळाल्यासारखे वाटते आहे."

सिनेमाचे लेखक अनिल मधुसूदन कालेलकर म्हणाले, " आजपर्यंत मी ३१ मालिका आणि २९ चित्रपट लिहिले. हृदयात समथिंग समथिंग हा माझा २९वा चित्रपट म्हणजेच ६०वी कलाकृती. वयाची साठी गाठणे जसे कौतुकाने साजरी करतात. तसाच हा माझ्या साठाव्या कलाकृतीचा कौतुक सोहळा आहे."

दिग्दर्शक प्रविण राजा कारळे म्हणतात, "अशोक मामांसोबत काम करण्याचे माझे स्वप्न हृदयात समथिंग समथिंग सिनेमामूळे पूर्ण झाले. प्रेमात पडल्यानंतरच्या धमाल गंमती-जंमतीना अशोकमामांच्या कॉमिक टाइमिंगमुळे रंगायला खूप मदत झाली आणि सिनेमा खूप मनोरंजक झाला आहे. "

या चित्रपटात काम करण्याविषयी अशोक सराफ सांगतात, "चांगली कथा, उत्तम दिग्दर्शन आणि कसलेले कलाकार यामुळे कोणत्याही धाटणीचा सिनेमा मनोरंजक होतो. प्रेमात पडलेल्या प्रत्येकाला हा सिनेमा आपल्या हृदयाजवळचा वाटेल, असा मला विश्वास आहे."

पिरॅमीड फिल्म्स हाऊस प्रस्तुत विनोदकुमार जैन, शैलेंद्र पारख, स्वप्नील चव्हाण, आणि अतुल गुगळे यांची निर्मिती असलेला प्रवीण राजा कारळे दिग्दर्शित, अनिकेत विश्वासराव, स्नेहा चव्हाण, भुषण कडू, प्रियंका यादव आणि अशोक सराफ यांच्या अभिनयाने सजलेला ‘हृदयात समथिंग समथिंग’ चित्रपट ५ ऑक्टोबर २०१८ ला रिलीज होणार आहे.