माधुरी पवार करणार प्रेक्षकांची 'दिशाभूल'; 'देवमाणूस'ची अभिनेत्री दिसणार नव्या अंदाजात

Madhuri pawar: चित्रपटात माधुरीसोबत अभिनेता तेजस बर्वे आणि अमृता धोंगडेदेखील स्क्रीन शेअर करणार आहे. 

'देवमाणूस', 'तुझ्यात जीव रंगला' या आणि अशा अनेक मालिका, रिअॅलिटी शोच्या माध्यमातून प्रेक्षकांच्या भेटीला येत असलेली अभिनेत्री म्हणजे माधुरी पवार. उत्तम अभिनयशैली आणि नृत्यकौशल्याच्या जोरावर माधुरीने प्रेक्षकांच्या मनात हक्काचं स्थान निर्माण केलं आहे. सोशल मीडियावर सक्रीय असणारी माधुरी कायमच प्रेक्षकांसाठी काही तरी नवीन कलाकृती घेऊन येत असते. यावेळीदेखील तिने असाच एक आनंदाचा धक्का चाहत्यांना दिला आहे. माधुरी लवकरच एका नव्या कोऱ्या मराठी चित्रपटात झळकणार आहे.

माधुरी लवकरच 'दिशाभूल' या आगामी मराठी चित्रपटात झळकणार आहे. नुकताच या चित्रपटाचा पुण्यात मुहूर्त सोहळा पार पडला. यावेळी संपूर्ण चित्रपटाची टीम उपस्थित होती. या चित्रपटात माधुरीसोबत अभिनेता तेजस बर्वे आणि अमृता धोंगडेदेखील स्क्रीन शेअर करणार आहे. 

'दिशाभूल' हा एक वेगळ्या धाटणीची कथा असलेलला चित्रपट आहे. यातील माझी व्यक्तीरेखा ही, मी आजपर्यंत साकारलेल्या भूमिकांपेक्षा अतिशय वेगळी आहे. चित्रपटाचे शुटींग सुरू झालं असून नवीन टीम सोबत काम करताना मजा येत आहे, असं माधुरी म्हणाली.

दरम्यान, या चित्रपटाची निर्मिती आरती चव्हाण करत असून सानवी प्रोडक्शन अंतर्गत ही निर्मिती होत आहे. या चित्रपटाचं दिग्दर्शन कैलास जैन करत आहेत. या चित्रपटात माधुरीव्यतिरिक्त अमृता धोंगडे ,तेजस बर्वे ,शशांक शेंडे,  प्रणव रावराणे, अरुण कदम, सिद्धेश्वर झाडबुके, आशुतोष वाडेकर, शुभम मांढरे आणि अभिनेत्री प्रिया बेर्डे अशी तगडी स्टारकास्ट झळकणार आहे.