भाडिपा फेम सारंग साठ्येचा नवा लूक तुम्ही पाहिला का?

अनेक कलाकार त्यांच्या चित्रपटांसाठी, मालिकांसाठी नेहमीच त्यांच्या लूकवर मेहनत घेत असतात. आपल्या आगामी चित्रपटात आपण वेगळे दिसावे यासाठी त्यांचा ...

अ�

��ेक कलाकार त्यांच्या चित्रपटांसाठी, मालिकांसाठी नेहमीच त्यांच्या लूकवर मेहनत घेत असतात. आपल्या आगामी चित्रपटात आपण वेगळे दिसावे यासाठी त्यांचा हा प्रयत्न असतो. भाडिपामुळे प्रसिद्धीझोतात आलेला सारंग साठ्ये आता प्रेक्षकांना त्याच्या आगामी चित्रपटात एका वेगळ्या भूमिकेत पाहायला मिळणार आहे. 
सारंगने पुष्कर श्रोती दिग्दर्शित उबंटू या चित्रपटात देखील महत्त्वाची भूमिका बजावली होती. आता या चित्रपटानंतर सारंग एका हिंदी चित्रपटात झळकणार आहे. या चित्रपटाचे वैशिष्ट्य म्हणजे या चित्रपटात सांरगचा एक वेगळा लूक प्रेक्षकांना पाहायला मिळणार आहे. तसेच या चित्रपटातील सारंगची भूमिका त्याच्या आजवरच्या भूमिकांपेक्षा खूप वेगळी असणार आहे. आजवर सगळ्याच चित्रपटात, मालिकांमध्ये आपल्याला सारंगला दाढीमध्ये पाहायला मिळाले होते. पण त्याने पहिल्यांदाच एखाद्या भूमिकेसाठी त्याची दाढी काढली आहे. त्याने तब्बल बारा वर्षांनंतर त्याची दाढी काढली असल्याने एक वेगळाच सारंग सगळ्यांना पाहायला मिळतोय. सारंग हायजॅक या हिंदी चित्रपटात काम करणार आहे. हा एक विनोदी चित्रपट असून या चित्रपटात त्याची मुख्य भूमिका असणार आहे. सारंगने आजवर लेखन आणि दिग्दर्शन केले आहे. पण तो कधीच कोणत्या विनोदी भूमिकेत झळकला नव्हता. पण आता सांरग प्रेक्षकांना एका विनोदी भूमिकेत दिसणार असून त्यासाठी तो चांगलीच मेहनत घेत आहे. या चित्रपटातील लूकवर तर त्याने विशेष मेहनत घेतली आहे. चित्रपटामध्ये तो एका हायजॅकरच्या विनोदी भूमिकेत दिसणार आहे आणि या भूमिकेसाठी त्याने त्याची दाढी काढली आहे. त्याचा हा लूक पाहून सगळ्यांनाच आश्चर्याचा धक्का लागत आहे. सारंगला इतकी वर्षं दाढीत बघण्याची सगळ्यांना सवय झाली असल्याने सुरुवातीला त्याला ओळखणे त्याच्या जवळच्या लोकांना देखील कठीण झाले होते. त्यामुळे या नव्या लूकबद्दल सारंगदेखील खूप उत्सुक आहे. सारंगने पहिल्यांदा दाढी काढल्यानंतर त्याला कोणीच ओळखले नव्हते. विशेष म्हणजे त्याच्या आई-बाबांनीही त्याला ओळखले नाही. हायजॅक या चित्रपटाच्या शूटिंगसाठी तो जवळजवळ एक महिना दिल्लीतच होता.