मैत्रीची अनोखी 'सफर'! 'गुलाबी' सिनेमातील नवीन गाणं रिलीज, राहुल देशपांडेंचा आवाज

‘गुलाबी’ चित्रपटातील नवं गाणं प्रेक्षकांच्या भेटीला आलंय. या गाण्यात मैत्रिणींची अनोखी सफर दिसतेय (gulabi)

‘गुलाबी’ चित्रपटाची सर्वांना उत्सुकता आहे. ‘गुलाबी’ चित्रपटातून मृणाल कुलकर्णी, श्रृती मराठे आणि अश्विनी भावे या तिघीजणी पहिल्यांदाच या सिनेमाच्या निमित्ताने एकत्र अभिनय करत आहेत. ‘गुलाबी’ चित्रपट त्याच्या टीझरपासूनच चर्चेत आहे. या चित्रपटातून तीन मैत्रिणींची खास कहाणी बघणाला मिळणार आहे. ‘गुलाबी’ चित्रपटातील टायटल सॉंग काहीच दिवसांपूर्वी रिलीज झालं. आता या चित्रपटातील 'सफर' हे नवं गाणं प्रेक्षकांच्या भेटीला आलंय. 

‘गुलाबी’मधलं सफर हे नवं गाणं चर्चेत

 ‘गुलाबी’ चित्रपटातील ‘सफर’ हे प्रेरणादायी गाणे नुकतेच सोशल मीडियावर प्रदर्शित झाले असून अश्विनी भावे, मृणाल कुलकर्णी आणि श्रृती मराठे यांच्यावर चित्रीत करण्यात आलेले हे गाणे संगीतप्रेमींच्या प्रचंड पसंतीस येत आहे. अदिती द्रविड हिने शब्दबद्ध केलेल्या या गाण्याला साई - पियुष यांचे संगीत लाभले आहे. तर आयुष्याची सफर घडवणारे हे गाणे राहुल देशपांडे यांनी गायले आहे.

कधी रिलीज होणार 'गुलाबी'?

‘मी टाईम’ हरवलेल्या मैत्रिणी या गाण्यातून स्वत्वाचा शोध घेताना दिसत आहेत. आयुष्यातील त्यांची ही सफर त्यांना हरवलेले अस्तित्व शोधण्यात मदत करताना दिसत असून मैत्रीच्या नात्याचा एक सुंदर प्रवास यातून उलगडत आहे. गाण्याच्या सादरीकरणासह जयपूरची रंगीबेरंगी सफरही घडत आहे.  व्हायोलेट फ्लेम मोशन पिक्चर्स प्रस्तुत ‘गुलाबी’ चित्रपटाच्या सोनाली शिवणीकर, शीतल शानभाग, अभ्यंग कुवळेकर आणि स्वप्नील भामरे निर्माते आहेत. तर अभ्यंग कुवळेकर दिग्दर्शित या  चित्रपटात अश्विनी भावे, मृणाल कुलकर्णी आणि श्रृती मराठे यांच्या प्रमुख भूमिका आहेत. हा चित्रपट २२ नोव्हेंबर रोजी चित्रपटगृहात प्रेक्षकांच्या भेटीला येणार आहे.