प्रेमाच्या अलवार भावनेची हळूवार झलक! 'इलू इलू' सिनेमा या दिवशी होणार रिलीज; अशी आहे स्टारकास्ट

'इलू इलू' या आगामी मराठी सिनेमाची घोषणा करण्यात आली असून सिनेमाची स्टारकास्ट एकदम हटके आहे

मराठी मनोरंजन विश्वात एका रोमँटिक सिनेमाची काल घोषणा करण्यात आली. या सिनेमाचं नाव ‘इलू इलू’. हटके नाव असलेल्या या सिनेमाच्या नावापासूनच यामध्ये कलाकार कोण असणार याबद्दल चर्चा सुरु झालीय. प्रेमाच्या अलवार भावनेची हलकी झुळूक घेऊन प्रत्येकाच्या मनात दडलेल्या पहिल्या ‘इलू इलू’ची आठवण ताजी करायला फाळके फिल्म्स एण्टरटेन्मेंट प्रॉडक्शन आणि अजिंक्य बापू फाळके दिग्दर्शित ‘इलू इलू’ हा मराठी चित्रपट रिलीजसाठी सज्ज आहे.

कोण असणार कलाकार?

‘क्षण प्रेमाचे..गोड गुलाबी आठवणींचे’...असं म्हणत या चित्रपटाचे रोमँटिक मोशन पोस्टर प्रदर्शित झाले आहे. वीणा जामकर, आरोह वेलणकर, वनिता खरात, मीरा जगन्नाथ, निशांत भावसार, श्रीकांत यादव, कमलाकर सातपुते, अंकिता लांडे,  गौरव कलुस्ते, यश सणस, सोहम काळोखे, आर्या काकडे-जोशी, सिद्धेश लिंगायत हे कलाकार चित्रपटात असून हॉलीवूड आणि बॉलीवूड गाजवलेला एक लक्षवेधी चेहरा या चित्रपटातून मराठी रुपेरी पडद्यावर पदार्पण करणार आहे. हा चेहरा नेमका कोणाचा? याचा उलगडा लवकरच होणार आहे.

 कधी रिलीज होणार 'इलू इलू'?

'पहिलं प्रेम माणूस कधीच विसरत नाही,'  प्रत्येकाला त्यांच्या पहिल्या प्रेमाची आठवण करून देणारा ‘इलू इलू’ हा चित्रपट प्रत्येकाला नक्कीच नॉस्टॅलजिक करेल असा विश्वास दिग्दर्शक अजिंक्य बापू फाळके व्यक्त करतात. ‘इलू इलू’ चित्रपटाची कथा, पटकथा, संवाद नितीन विजय सुपेकर यांचे आहेत. निर्माते बाळासाहेब फाळके आणि हिंदवी फाळके तर सहनिर्माते यश मनोहर सणस आहेत.

छायांकन योगेश कोळी तर संकलन नितेश राठोड यांचे आहे. वैभव जोशी, वैभव देशमुख, प्रशांत मडपुवार यांच्या गीतांना अवधूत गुप्ते, ऋषिकेश रानडे, आर्या आंबेकर, रोहित राऊत, जनार्दन खंडाळकर यांचा स्वरसाज लाभला आहे. संगीत रोहित नागभिडे, विजय गवंडे  यांचे आहे. कलादिग्दर्शक योगेश इंगळे आहेत. ३१ जानेवारीला सिनेमा रिलीज होणार आहे.