"बसल्या जागी करायचा डान्स", मुक्ता बर्वेने शेअर केला रिक्षातील व्हिडिओ, म्हणते - खड्डे आणि त्यातून वाट काढत...

मुक्ता बर्वेने रस्त्यातील खड्ड्यांबाबत एक पोस्ट शेअर केली आहे. तिच्या या पोस्टने सगळ्यांचं लक्ष वेधून घेतलं आहे. 

मुक्ता बर्वे ही मराठी कलाविश्वातील लोकप्रिय अभिनेत्री आहे. 'जोगवा', 'मुंबई-पुणे-मुंबई', 'व्हाय', 'आम्ही दोघी', 'डबल सीट', 'स्माइल प्लीज' अशा अनेक मराठी सिनेमांत विविधांगी भूमिका साकारून मुक्ताने अभिनयाचा ठसा उमटवला. मुक्ता सोशल मीडियावरही प्रचंड सक्रिय असल्याचं पाहायला मिळतं. नवीन प्रोजेक्टबरोबरच अनेक पोस्टही ती शेअर करताना दिसते. नुकत्याच तिने केलेल्या एका पोस्टने सगळ्यांचं लक्ष वेधून घेतलं आहे. 

खड्ड्यांमुळे रस्त्यांची झालेली दुर्दशा यामुळे सामान्य नागरिकांप्रमाणेच कलाकारांनाही त्रास सहन करावा लागत आहे. अनेक कलाकारांनी याबाबत पोस्टद्वारे मत मांडून संताप व्यक्त केला आहे. आता मुक्ता बर्वेने रस्त्यातील खड्ड्यांबाबत एक पोस्ट शेअर केली आहे. नुकताच मुक्ताने रिक्षाने प्रवास केला. यावेळचा अनुभव शेअर करत तिने एक मजेशीर व्हिडिओ पोस्ट केला आहे. या व्हिडिओत मुक्ताने तोंडाला स्कार्फ बांधल्याचं दिसत आहे. या व्हिडिओला तिने हटके कॅप्शनही दिलं आहे. "आताआपण शिकुया ‘बसल्याजागी करायचा नाच’.  यासाठी लागणारं साहित्य- रिक्षा, खड्डे आणि खड्यातून वाट काढत जाणारा रस्ता", असं कॅप्शन मुक्ताने या व्हिडिओला दिलं आहे. या व्हिडिओवर नेटकऱ्यांबरोबरच सेलिब्रिटींनीही कमेंट केल्या आहेत. 

दरम्यान, मुक्ताने चित्रपटांबरोबरच मालिका आणि नाटकांमध्येही काम केलं आहे. 'एका लग्नाची दुसरी गोष्ट', 'अजुनही बरसात आहे', 'अग्निहोत्र' या मुक्ताच्या मालिका विशेष गाजल्या. मुक्ता सध्या तिच्या नुकत्याच प्रदर्शित झालेल्या मराठी सिनेमामुळे चर्चेत आहे.