'सावध रहा...!! कदाचित उद्या तुमची वेळ'; मुक्ता बर्वेच्या रहस्यमय 'वाय' चा टीझर प्रदर्शित

Mukta barve movie:''वाय' या शिर्षकामागे खूप मोठा अर्थ दडलेला आहे. वाय ही आपल्या सर्वांच्या अस्तित्वाची, अस्तित्वासाठीच्या संघर्षाची कहाणी आहे.

गेल्या कित्येक दिवसांपासून सोशल मीडियावर 'वाय' (Y) या आगामी मराठी चित्रपटाची चर्चा सुरु आहे. अभिनेत्री मुक्ता बर्वे हिची मुख्य भूमिका असलेल्या या चित्रपटाचं काही दिवसांपूर्वीच पहिलं पोस्टर प्रदर्शित झालं. या पोस्टरमध्य मुक्ता हातात मशाल घेऊन उभी असल्याचं पाहायला मिळालं. हे पोस्टर पाहिल्यानंतर या चित्रपटाचं कथानक काही तरी हटके असणार याचा अंदाज प्रेक्षकांना आला. त्यामुळे या चित्रपटाविषयी प्रेक्षकांची असलेली उत्सुकता वाढली. यामध्येच आता या चित्रपटाचा टीझर प्रदर्शित झाला आहे.

अजित सूर्यकांत वाडीकर दिग्दर्शत 'वाय'  या चित्रपटाचा टीझर मुक्ताने तिच्या सोशल मीडियावर शेअर केला आहे. या टीझरमध्ये चित्रपटाची थोडक्यात झलक दाखवण्यात आली आहे. या टीझरमधून मुक्ता हातात मशाल घेऊन नेमकी कोणाशी लढा द्यायला निघाली आहे याचा अंदाज लावता येत आहे.

View this post on Instagram

A post shared by Y The Film (@ythefilm)

काय आहे टीझरमध्ये?

प्रदर्शित झालेल्या टीझर मुक्ता अचानकपणे झोपेतून जागी होते आणि एक अक्राळविक्राळ कुत्रा गुरगुरवत तिच्यावर झेप घेतो. हा कुत्रा मुक्ताकडे का झेपावत आहे? नक्की काय घडतंय? कशासाठी घडतंय? अर्थात या सर्व प्रश्नांची उत्तरे प्रेक्षकांना चित्रपट पाहिल्यावर कळणार आहेतच. 

''वाय' या शिर्षकामागे खूप मोठा अर्थ दडलेला आहे. वाय ही आपल्या सर्वांच्या अस्तित्वाची, अस्तित्वासाठीच्या संघर्षाची कहाणी आहे. ह्या टीझरचा आणि 'वाय' या नावाचा अर्थ तुम्हां सर्वांना जाणून घ्यायचा आहेच आणि त्यासाठी 'वाय' नक्की म्हणजे नक्की पहा," असं दिग्दर्शक म्हणाले.
दरम्यान, चित्रपटाच्या उत्कंठापूर्ण प्रमोशनची आणि 'वाय' या शिर्षकाची चर्चा सर्वत्र सुरू असतांना या टीझरने कुतुहलात आणखी भर पडली आहे. हा चित्रपट येत्या २४ जून रोजी सर्वत्र प्रदर्शित होणार आहे.