​सुबोध भावे आणि श्रुती मराठे आता झळकणार या चित्रपटात

'

;बंध नायलॉनचे' मधून लोकांच्या पसंतीस पडलेली सुपरहिट जोडी सुबोध भावे आणि श्रुती मराठे पुन्हा एकदा मोठ्या पडद्यावर येत आहे. सुबोध आणि श्रुती तब्बल दोन वर्षानंतर एकत्र काम करणार आहेत. तूर्तास या सिनेमाचे नाव ठरले नसले तरी फ्रेम्स इन मोशन प्रोडक्शन्स निर्मित या सिनेमाचे समीर रमेश सुर्वे दिग्दर्शन कऱणार आहेत. सुबोध - श्रुती या जोडीचा चाहतावर्गदेखील मोठा असल्यामुळे त्यांच्या या आगामी सिनेमाची उत्सुकता प्रेक्षकांना लागली आहे.
सुबोधसोबत श्रुती काम करणार असल्याचे श्रुतीने काही महिन्यांपूर्वीच सोशल मीडियाच्या माध्यमातून तिच्या चाहत्यांना सांगितले होते. श्रुतीने तिचा आणि सुबोधचा एक छानसा फोटो सोशल नेटवर्किंगवर पोस्ट केला होता. या फोटोसोबत तिने कॅप्शन लिहिले होते की, माझा नवीन चित्रपट, नवीन दिवस पण जुना मित्र. या कॅप्शनवरून ते दोघे चित्रपटात एकत्र काम करत असल्याचे तिने सांगितले होते. या चित्रपटाचे चित्रीकरण दुबईत झाले होते. या चित्रपटाच्या चित्रीकरणाच्या वेळेचा एक व्हिडिओदेखील श्रुतीने सोशल मीडियावर पोस्ट केला होता. या व्हिडिओमध्ये तिची हेअर ड्रेसर तिचे केस सेट करताना दिसत होती. यावरून या चित्रपटातील श्रुतीचा लूकदेखील वेगळा असणार असल्याची चर्चा रंगली होती. हा व्हिडिओ पोस्ट करताना तिने अशाप्रकारे केस सेट करणे हे टॉर्चर असल्याचे म्हणत हसतानाचे अनेक स्मायलीदेखील पोस्ट केले होते. या तिच्या पोस्टवरूनच श्रुती आणि सुबोध चित्रपटात एकत्र काम करत असल्याचे सगळ्यांना कळले होते. पण या चित्रपटाबाबत अधिक माहिती न देणेच श्रुतीने पसंत केले होते. पण आता या चित्रपटाचा दिग्दर्शक कोण असणार हे समोर आले आहे. 
सुबोध आणि श्रुतीच्या या नव्या चित्रपटाची कथा काय असणार तसेच या चित्रपटात महत्त्वाच्या भूमिकेत आणखी कोण कलाकार असणार याबाबत सुबोध आणि श्रुतीने मौन राखणेच पसंत केले आहे. त्यामुळे त्यांच्या चाहत्यांना काही दिवस तरी त्यांच्या या चित्रपटाच्या घोषणेची वाट पाहावी लागणार आहे. 

Also Read : 'त्या' व्यक्तीच्या आठवणीमुळे,सुबोध झाला भावूक!