स्वप्निल जोशीच्या बळीचे नवीन पोस्टर आऊट, प्रेक्षकांमधील उत्कंठा शिगेला

नुकत्याच प्रदर्शित झालेल्या पोस्टरवर स्वप्निलचा अगदी घाबरवून टाकणारा चेहरा आहे.

‘बळी’ या चित्रपटाच्या नवीन पोस्टरचे अनावरण नुकतेच करण्यात आले. आधीच उत्तम अशी निर्मितीमुल्ये जपणाऱ्या टीमचा चित्रपट म्हणून प्रेक्षकांमध्ये उत्कंठा लागून राहिलेल्या ‘बळी’च्या या पोस्टरमुळे चित्रपटाबद्दलची उत्कंठा आता शिगेला पोहोचली आहे.  ‘बळी’ हा चित्रपट १६ एप्रिल रोजी प्रदर्शित होत असून या हॉरर चित्रपटाचे दिग्दर्शन विशाल फुरिया यांचे आहे. स्वप्निल जोशी यात महत्वाच्या भूमिकेत आहे.

 
नुकत्याच प्रदर्शित झालेल्या पोस्टरवर स्वप्निलचा अगदी घाबरवून टाकणारा चेहरा आहे. अत्यंत रक्तरंजित अशा मनगटांनी त्याचा चेहरा घट्ट पकडला असून स्वप्निलच्या चेहऱ्यावर रक्ताचे लोट दिसत आहेत. ज्याच्या मनगटांमध्ये स्वप्निलचा चेहरा जखडला आहे, त्याचा चेहरा दिसत नसला तरी तो खूप भयावह आहे, हे जाणवते. स्वप्निलच्या डोळ्यांतील अंगार हे पोस्टर पाहणाऱ्याच्या काळजात धडकी भरविल्याशिवाय राहत नाही. त्यातच या पोस्टरवरील ‘कोण आहे एलिझाबेथ?’ हा प्रश्न आणखी अनेकानेक प्रश्न निर्माण करतो.
 

या चित्रपटाबद्दल स्वप्निल तो म्हणतो, “यंदा मी नव्या प्रकारातील चित्रपट करेन, असे आश्वासन गेल्यावर्षी मी प्रेक्षकांना दिले होते. त्या दृष्टीने मी उचललेले हे एक पाऊल आहे. हॉरर चित्रपट करण्याची संधी मला मिळते आहे, हे मी माझे भाग्य समजतो. ते करत असताना कार्तिक, अर्जुन यांच्यासारखे माझे आवडते निर्माते मला मिळाले आणि त्याचवेळी माझा लाडका दिग्दर्शक विशाल हा चित्रपट दिग्दर्शित करतो आहे. मला पूर्ण खात्री आहे की, आम्ही एकत्रितपणे प्रेक्षकांना घाबरवू शकतो. आणि त्याचा प्रेक्षक चांगलाच आनंद घेतील.”