TDM चा राडा! 'या' तारखेला सिनेमा पुन्हा प्रदर्शित होणार, भाऊराव कऱ्हाडे म्हणाले, "नवी उमेद..."

TDM सिनेमा पुन्हा संपूर्ण महाराष्ट्रात प्रदर्शित करण्याचा निर्णय भाऊराव कऱ्हाडे यांनी घेतला आहे.

मराठी दिग्दर्शक भाऊराव कऱ्हाडेंचा (Bhaurao Karhade) बहुचर्चित चित्रपच TDM काही दिवसांपूर्वी रिलीज झाला होता. मात्र शोज न मिळाल्या कारणाने चित्रपट सिनेमागृहातून बाहेर पडला. सिनेमातील कलाकारांवर अक्षरश: थिएटरमध्ये जाऊन रडण्याची वेळ आली. स्क्रीन्सच मिळत नाही म्हणल्यावर भाऊराव कऱ्हाडे नाराज झाले आणि त्यांनी प्रदर्शन थांबवलं. पण आता TDM चा धमाका पुन्हा होणार आहे.

९ जूनला पुन्हा प्रदर्शित होणार

TDM सिनेमा पुन्हा संपूर्ण महाराष्ट्रात प्रदर्शित करण्याचा निर्णय भाऊराव कऱ्हाडे यांनी घेतला आहे. ९ जूनपासून सिनेमा पुन्हा रिलीज करत आहोत अशी घोषणा भाऊराव कऱ्हाडे यांनी केली. सोशल मीडियावर ही माहिती देत ते म्हणाले,

" नमस्कार रसिकप्रेक्षकहो,
#ISupportTDM मोहीम उत्स्फुर्तपणे राबवून आपण सर्वांनी जो काही प्रतिसाद दिला त्या बद्दल आपले आभार मानावे तेवढे कमीच आहेत .
आपल्या या खंबीर पाठिंब्यामुळे आम्हाला एक नवी उमेद मिळाली आहे आणि याच उमेदीने आम्ही 'टीडीएम' चित्रपट पुन्हा प्रदर्शनासाठी सज्ज झालो आहोत...'टीडीएम' च्या प्रवासाला पुन्हा सुरवात होत आहे ... ९ जून रोजी संपूर्ण महाराष्ट्रात '#टीडीएम' प्रदर्शित होत आहे. आपल्या सर्वांचे उदंड प्रेम मिळेल याची खात्री आहे...
तेव्हा भेटूया थेटरात... ९ जून ला...
#TDMOn9June #TDM In Cinemas 9th June 2023. 

'ख्वाडा', 'बबन' असे सुपरहिट सिनेमे देणाऱ्या भाऊराव कऱ्हाडेंना स्क्रीन्सच मिळत नाहीत हे काही लोकांच्या पचनी पडले नाही. त्यांच्या 'ख्वाडा' सिनेमाला तर राष्ट्रीय पुरस्कार मिळाला. तरी त्यांच्यावर ही वेळ आली. आता सिनेमा पुन्हा प्रदर्शित करण्याचा निर्णय घेतल्यावर प्रेक्षकांनी त्यांना पाठिंबा दिलाय. 'आमची तुम्हाला साथ आहे भाऊराव साहेब परत एकदा पिक्चर बघायला तयार','ह्यावेळेस जाळ आन धूर संगटच' अशा कमेंट्स प्रेक्षकांनी त्यांच्या पोस्टवर केल्या आहेत. 

अभिनेता पृथ्वीराज थोरात आणि अभिनेत्री कालिंदी निस्ताने ही नवोदित जोडगोळी या TDM मध्ये दिसणार आहे. सिनेमातील गाणीही पसंत केली गेली आहेत. काही जणांनी सिनेमा पाहिला असला तरी पुन्हा थिएटरमध्ये पाहू अशा कमेंट्स प्रेक्षकांनी केल्या आहेत.