Varhadi Vajantri Movie :  ‘वऱ्हाडी वाजंत्री’ची भन्नाट टायटल्स पाहिलीत का? एकदा बघाच

Varhadi Vajantri Movie : वऱ्हाडी वाजंत्री या चित्रपटाचे टायटल्स विशेष आकर्षित करणारे आहेत...

Varhadi Vajantri Movie : चित्रपट म्हणजे मनोरंजनाची अद्भुत कला आणि ही कला पाहणं हा विलक्षण अनुभव. आजपर्यंत विविध जातकुळीच्या चित्रपटातून अनेकविध आशय विषयाने प्रतिभावंतांच्या प्रतिभा उजळल्या आहेत. आपल्या चित्रपटाला रसिकांच्या हृदयात स्थान मिळावं यासाठी ते नानाविविध प्रयत्न करताना दिसतात. असंच काहीतरी वेगळं अफलातून मनोरंजन करण्यासाठी अभिनेते दिग्दर्शक विजय पाटकर सज्ज झाले आहेत. त्यांचा धम्माल विनोदी चित्रपट ‘वऱ्हाडी वाजंत्री’ येत्या ११ नोव्हेंबरला प्रदर्शित होत आहे.
आजवर अनेक चित्रपटांची टायटल्स रसिक प्रेक्षकांच्या आकर्षणाचा विषय ठरलेली आहेत.

विषयाला अनुसरून आपल्या चित्रपटाची टायटल्स करण्यासाठी निर्माते दिग्दर्शक प्रयत्नरत आहेत. विशेष टॅलेंटचा वापरून करून आकर्षक टायटल्स निर्मितीवर भर दिला जातो. अशाच काहीशा भन्नाट कल्पनांमध्ये आपल्या चित्रपटाचं नाव रसिकांच्या मन:पटलावर कोरण्यासाठी अभिनेते दिग्दर्शक विजय पाटकर सध्या गुंतले आहेत. त्यांच्या ‘वऱ्हाडी वाजंत्री’ या चित्रपटाचे टायटल्स तयार करण्याचं काम जोमात सुरु आहे.

 प्रख्यात पब्लिसिटी डिझायनर मिलिंद मटकर यांच्या भन्नाट कल्पना योजली आहे. कलाकाराचं बारकाईने निरीक्षण करून गंमतशीर कार्टून रेखाटण्यात विजय शिंदे हा हरहुन्नरी कलावंत गुंतला आहे. दिग्दर्शक विजय पाटकर आणि निर्माते कॅप्टन कल्पेश रविंद्र मगर, सहनिर्माते अतुल राजारामशेठ ओहळ यांच्या एकत्रित प्रयत्नातून या चित्रपटाची धम्माल उडवणारी श्रेयनामावली मिश्किल विनोदी हावभावांसह अनोख्या स्टाईलने पडद्यावर आणण्याचे प्रयत्न आहेत.

नावाप्रमाणेच या चित्रपटात एकापेक्षा अवखळ विनोदवीरांना घेऊन  विनोदाचा बादशहा मकरंद अनासपुरे ‘वऱ्हाडी वाजंत्री’सह येत आहे. त्याच्यासह २१ नमुनेदार विनोदवीरांच्या मिश्किल छटा विनोदी ढंगात टायटल्समध्ये उमटविण्याच्या अवघड कामात सध्या हे पंचक व्यस्त आहेत. मकरंद अनासपुरे यांचे भन्नाट विनोदी कार्टून लहान थोरांना गुदगुल्या करणारे आहे. त्यासोबतच पॅडी आणि हेमांगीचीही कार्टून्स लयभारी झाली असून रसिकांना प्रेमात पाडणारी आहे. याहून जबरदस्त म्हणजे मोहन जोशी, रीमा यांचे ‘बुलेटराजा-राणीचे’ दर्शन.

यासोबतच प्रिया बेर्डे - विजय कदम यांच्या ठुमक्याचा ठेका कमाल झाला आहे. जयवंत वाडकर, आनंदा कारेकर, सुनील गोडबोले, पूर्णिमा अहिरे, गणेश रेवडेकर, प्रभाकर मोरे, प्रशांत तपस्वी, राजेश चिटणीस, जयवंत भालेकर, विनीत बोंडे, शिवाजी रेडेकर, आशुतोष वाडेकर, शीतल कलाहपुरे, साक्षी परांजपे आदी कलाकारांच्याही इरसाल नमुनेबाज व्यक्तिरेखा या चित्रपटाच्या कथेसोबतच ‘टायटल्समधेही धम्माल’ करणार आहेत. हे ‘वऱ्हाडी वाजंत्री’ प्रेक्षागृहात हशाच हशा पिकणार हे वेगळं सांगण्याची गरज नाहीच.