मराठमोळ्या दिग्दर्शकाच्या बॉलिवूड सिनेमाची बॉक्स ऑफिसवर हवा! 'मुंज्या'ने २ दिवसांत कमावले 'इतके' कोटी

७ जूनला प्रदर्शित झालेल्या 'मुंज्या' सिनेमाने अवघ्या दोनच दिवसांत कोटींची कमाई केली आहे. या सिनेमाचं बॉक्स ऑफिस कलेक्शन समोर आलं आहे. 

'मुंज्या' हा हॉरर कॉमेडी हिंदी सिनेमा अलिकडेच प्रदर्शित झाला आहे. या सिनेमाच्या टीझर आणि ट्रेलरने प्रेक्षकांची उत्सुकता वाढवली होती. अखेर शुक्रवारी हा सिनेमा सर्वत्र प्रदर्शित झाला. हटके स्टोरी आणि उत्तम क्लायमॅक्स असलेल्या हा सिनेमा प्रेक्षकांच्या पसंतीस उतरत आहे. ७ जूनला प्रदर्शित झालेल्या 'मुंज्या' सिनेमाने अवघ्या दोनच दिवसांत कोटींची कमाई केली आहे. या सिनेमाचं बॉक्स ऑफिस कलेक्शन समोर आलं आहे. 

मराठमोळा दिग्दर्शक आदित्य सरपोतदारने 'मुंज्या' सिनेमाचं दिग्दर्शन केलं आहे. आदित्यचा हा सिनेमा पाहण्यासाठी प्रेक्षक चित्रपटगृहात गर्दी करत आहेत. ठिकठिकाणी या सिनेमाचे शो हाऊसफूल होत आहेत. बॉक्स ऑफिसवरही 'मुंज्या' सिनेमा इतर बॉलिवूड सिनेमांना तगडी टक्कर देताना दिसत आहे. मराठी दिग्दर्शकाच्या या पहिल्या वहिल्या बॉलिवूड सिनेमाची बॉक्स ऑफिसवर हवा पाहायला मिळत आहे. 

सॅकनिल्कने दिलेल्या रिपोर्टनुसार, 'मुंज्या' सिनेमाने प्रदर्शनाच्या दिवशी बॉक्स ऑफिसवर जवळपास ४ कोटींची कमाई केली होती. पण, दुसऱ्याच दिवशी मुंज्या सिनेमाने कमाईच्या बाबतीत मुसंडी मारली आहे. दुसऱ्या दिवशी 'मुंज्या' सिनेमाने दुप्पट कमाई केली आहे. शनिवारी या सिनेमाने तब्बल ७.२५ कोटींचा बिजनेस केला आहे. दोन दिवसांत 'मुंज्या' सिनेमाने ११.२५ कोटींचा गल्ला जमवला आहे. 

या सिनेमात अभय वर्मा, शर्वरी वाघ, मोना सिंग यांच्या मुख्य भूमिका आहेत. तर सुहास जोशी, रसिका वेंगुर्लेकर, भाग्यश्री लिमये, अजय पूरकर हे मराठी कलाकारही महत्त्वाच्या भूमिकेत आहेत.'स्त्री' या सिनेमाचे मेकर्स मॅडॉक फिल्म्सकडून 'मुंज्या' सिनेमाची निर्मिती करण्यात आली आहे.