गुरु ठोको ताली...! 5 वर्षांनंतर कपिलच्या शोमध्ये नवज्योतसिंग सिद्धूची होणार एन्ट्री

'द ग्रेट इंडियन कपिल शो'च्या आगामी एपिसोडमध्ये नवज्योतसिंग सिद्धूची एन्ट्री होणार आहे. 

कॉमेडीच्या जगात कपिल शर्मा (Kapil Sharma) सध्या अग्रेसर आहे. 'कॉमेडी नाईट्स विथ कपिल शर्मा'मधून त्याने अनेक वर्ष प्रेक्षकांचं मनोरंजन केलं. यानंतर  तो नेटफ्लिक्सवर 'द ग्रेट इंडियन कपिल शो' (The Great Indian Kapil Show)घेऊन आला. नेटफ्लिक्समुळे आता तो जगभरात पोहोचला आहे.   या  शोचा नवीन प्रोमो समोर आला असून हा आता प्रचंड व्हायरल होत आहे.

'द ग्रेट इंडियन कपिल शो'च्या आगामी एपिसोडमध्ये नवज्योतसिंग सिद्धूची एन्ट्री होणार आहे. समोर आलेल्या प्रोमोमध्ये समोरील खुर्चीवर अर्चना पूरन सिंहच्या ऐवजी  नवज्योतसिंग सिद्धू बसल्याचं दिसत आहे.  नवज्योतसिंग सिद्धूला पाहून कपिल हैरान होतो.   नवज्योतसिंग सिद्धू  यांच्याशिवाय भारतीय क्रिकेट संघाचा माजी फिरकी गोलंदाज हरभजन सिंग त्याची पत्नी आणि अभिनेत्री गीता बसरा प्रोमोमध्ये दिसून येत आहेत. 

छोट्या पडद्यानंतर आता ओटीटी प्लॅटफॉर्मवरील कपिल शर्माचा कॉमेडी शो प्रेक्षकांची पहिली पसंती ठरला आहे.  नवज्योतसिंग सिद्धू 2013 मध्ये  कपिल शर्माच्या छोट्या पडद्यावरील कॉमेडी शोचा एक भाग होते. या कॉमेडी शोमध्ये त्यांनी जवळपास 6 वर्षे जजची खुर्ची सांभाळली. पण, 2019 मध्ये काही वादग्रस्त विधानांमुळे त्यांना कपिल शर्माचा शो सोडावा लागला होता आणि त्यानंतर अर्चना पूरण सिंह या शोमध्ये जजच्या भूमिकेत पाहायला मिळाल्या.