'पवित्र रिश्ता'च्या एका एपिसोडसाठी अंकिता लोखंडेला मिळायचे 'इतके' पैसे, 'बिग बॉस'च्या घरात अभिनेत्रीचा खुलासा

अंकिता लोखंडे पवित्रा रिश्तासाठी घ्यायची 'इतकं' मानधन, स्वत:च केला खुलासा

'बिग बॉस हिंदी'च्या नव्या पर्वाला काही दिवसांपूर्वीच सुरुवात झाली. 'बिग बॉस १७'च्या घरात मराठमोळ्या अंकिता लोखंडेने पती विकी जैनसह एन्ट्री घेतल्याने अनेकांच्या भुवया उंचावल्या.

पहिल्या दिवसापासूनच अंकिता 'बिग बॉस'च्या घरातील चर्चेतील चेहऱ्यांपैकी एक आहे. 'बिग बॉस'च्या घरात अंकिताने वैयक्तिक आयुष्याबाबत अनेक खुलासे केले आहेत. सुशांत सिंह राजपूतबरोबरच्या रिलेशनशिपपासून ते अभिनयातील करिअरबद्दल अनेक गोष्टींबाबत अंकिताने 'बिग बॉस'च्या घरात मौन सोडलं.

मुनव्वर फारुकीबरोबर बोलताना अंकिताने अभिनय क्षेत्रातील तिच्या स्ट्रगलिंगवरही भाष्य केलं. अंकिता म्हणाली, "एक वेळ अशी होती जेव्हा माझ्याकडे खरंच पैसे नव्हते. ऑडिशनला जाऊ की अन्न खाऊ अशी वेळ माझ्यावर आली होती. शेवटी आईवडिलांकडून मी कधीपर्यंत पैसे मागणार होते."

अंकिताला कलाविश्वात १७ वर्ष पूर्ण झाली आहेत.अंकिताने २००९ साली एकता कपूरच्या 'पवित्रा रिश्ता' मालिकेतून अभिनयात पदार्पण केलं होतं. या मालिकेत तिने अर्चना ही मुख्य नायिकेची भूमिका साकारली होती.

अंकिताबरोबर या मालिकेत सुशांत सिंह राजपूतही मुख्य भूमिकेत होता. सुशांत आणि अंकिता साकारत असलेल्या अर्चना-मानवचा 'पवित्रा रिश्ता' प्रेक्षकांच्या भलताच पसंतीस पडला होता. या मालिकेत त्यांच्या जोडीला लोकप्रियता मिळाली होती.

पहिल्याच मालिकेने अंकिताला लोकप्रियतेच्या शिखरावर नेऊन ठेवलं होतं. 'पवित्र रिश्ता'मुळे अंकिता प्रसिद्धीझोतात आली होती. तिचं फॅन फॉलोविंगही प्रचंड वाढलं होतं.

पण, 'पवित्र रिश्ता'साठी अंकिताला किती पैसे मिळत होते, हे तुम्हाला माहितीये का? अंकिताने 'बिग बॉास'च्या घरात याबाबत नुकताच खुलासा केला. 'पवित्र रिश्ता'च्या एका एपिसोडसाठी अंकिताला २ हजार रुपये मानधन मिळायचं.

अंकिता म्हणाली, "पवित्र रिश्तासाठी मला प्रत्येक दिवशी २००० रुपये मिळायचे. जेव्हा माझ्या अकाऊंटमध्ये ५०हजार रुपये जमा झाले तेव्हा मला फार आनंद झाला होता. मी एवढे पैसे कधीच पाहिले नव्हते. त्या काळात माझे आईवडील माझी ताकद होते."

'पवित्र रिश्ता'नंतर अंकिता कंगना रणौतच्या 'मणिकर्णिका' चित्रपटात महत्त्वाची भूमिका साकारताना दिसली. तिने 'स्मार्ट जोडी' या रिएलिटी शोमध्ये पती विकी जैनसह सहभाग घेतला होता.