"मला स्क्रीनवर श्रीदेवीची भूमिका साकारायची आहे", प्रसिद्ध अभिनेत्रीने व्यक्त केली इच्छा

श्रीदेवीच्या बायोपिकमध्ये ही अभिनेत्री खरंच शोभून दिसेल का?

भारतीय सिनेमाच्या इतिसाहात सर्वोत्कृष्ट अभिनेत्रींचं नाव घ्यायचं तर श्रीदेवीचं (Sridevi) नाव आवर्जुन येतं. वयाच्या चौथ्या वर्षापासून अभिनय करणाऱ्या श्रीदेवी यांनी करिअरमध्ये अनेक सुपरहिट सिनेमे दिले.

पुरुषप्रधान संस्कृतीतही श्रीदेवी यांनी महिलेच्या जीवावरही सिनेमा हिट होतो हे दाखवून दिलं होतं. तसंच त्यांना भाषेचाही अडथळा नव्हता. हिंदीसह तेलुगु, तमिळ, मल्याळम, कन्नड अशा अनेक भाषांमध्ये त्यांनी काम केलं.

१९६७ साली त्यांनी वयाच्या चौथ्या वर्षी अभिनयाला सुरुवात केली. तर १९७६ साली वयाच्या १३ व्या वर्षीच त्यांनी तमिळ सिनेमात मुख्य अभिनेत्री म्हणून पदार्पण केलं.

१९७९ साली आलेला 'सोलवा सावन' हा त्यांचा पहिला हिंदी सिनेमा. नंतर त्यांनी 'चांदनी','मवाली','मिस्टर इंडिया','लाडला','जुदाई','सदमा' असे एकापेक्षा एक हिट सिनेमे दिले.

श्रीदेवी यांना पहिल्या महिला सुपरस्टार असंही म्हटलं जातं. तब्बल ५० वर्ष त्यांनी इंडस्ट्रीत काम केलं. त्यांना पद्मश्री पुरस्कारानेही सम्मानित करण्यात आलं.

अशा या सर्वांच्या आवडत्या अभिनेत्रीचा २०१८ साली दुबईत अकस्मात मृत्यू झाला. श्रीदेवी कुटुंबासोबत दुबईत एका लग्नसोहळ्याला गेल्या होत्या. तिथे बाथटबमध्ये त्यांचा मृतदेह आढळला.

श्रीदेवी यांच्या बायोपिकची चर्चा अनेकदा होते. त्यांच्या भूमिकेसाठी बऱ्याच अभिनेत्रींचं नाव समोर आलं होतं. आता नुकतंच अभिनेत्री तमन्ना भाटियाने श्रीदेवी यांच्या बायोपिकमध्ये काम करण्याची इच्छा व्यक्त केली आहे

"श्रीदेवी यांची भूमिका पडद्यावर साकारण्याची माझी खूप इच्छा आहे. मला वाटतं त्या सुपरआयकॉनिक होत्या. मी कायमच त्यांची सर्वात मोठी चाहती राहिली आहे."