एकेकाळी अक्षय कुमारसोबत केला होता रोमान्स, आता इलियानाला फिल्म इंडस्ट्री करणार बॅन?

Ileana D Cruz : बॉलिवूडपासून साऊथ चित्रपटसृष्टीपर्यंत आपल्या अभिनयाने प्रेक्षकांचे लक्ष वेधून घेणाऱ्या या अभिनेत्रीबाबत एक धक्कादायक बातमी समोर येत आहे.

अभिनेत्री इलियाना डिक्रूझ (Ileana D Cruz)नुकतीच आपल्या प्रकृती अस्वास्थ्यामुळे चर्चेत आली होती. तिने आपल्या प्रकृतीची माहिती आपल्या सोशल मीडिया अकाउंटवरून दिली होती. दरम्यान, बॉलिवूडपासून साऊथ चित्रपटसृष्टीपर्यंत आपल्या अभिनयाने प्रेक्षकांचे लक्ष वेधून घेणाऱ्या या अभिनेत्रीबाबत एक धक्कादायक बातमी समोर येत आहे.

रिपोर्ट्नुसार, अभिनेत्री इलियाना डिक्रूझला आता तमिळ फिल्म इंडस्ट्री बॅन करण्याची शक्यता वर्तविली जात आहे. तमिळ रिपोर्ट्सनुसार, एका तमिळ निर्मात्याने तक्रार दाखल केली आहे की, इलियाना डिक्रूझ अॅडव्हॉन्स पैसे घेऊनही शुटिंगसाठी आली नाही. यामुळे निर्मात्याचे मोठे आर्थिक नुकसान झाले आहे.

यानंतर तामिळ निर्माते इलियाना डिक्रूझला त्यांच्या चित्रपटात घेण्यास टाळाटाळ करत आहेत. मात्र, याबाबत अद्याप कोणतेही अधिकृत वक्तव्य आलेले नाही. तसेच, इलियाना डिक्रूझच्या टीमनेही याबाबत कोणतेही स्पष्टीकरण दिलेले नाही.

इलियाना डिक्रूझने इंस्टाग्रामवर हॉस्पिटलच्या बेडवरून फोटो शेअर केले आहेत. या फोटोंमध्ये इलियाना डिक्रूझ फारच आजारी आणि थकलेली दिसत होती. एका फोटोमध्ये अभिनेत्रीच्या हाताला सलाईन लावलेलं दिसत होते. हे फोटो शेअर करत इलियाना डिक्रूझने पोस्टमध्ये लिहिले होते की, एक दिवसही तुमच्या आयुष्यात खूप बदल घडवू शकतो… काही प्रेमळ डॉक्टर आणि आयव्ही फ्लुइड्सच्या तीन पिशव्या!

याशिवाय, आणखी एक फोटो शेअर करत तिने आपल्या तब्येतीची अपडेट दिली होती. यात इलियाना डिक्रूझने म्हटले की, जे लोक माझ्या तब्येतीची माहिती घेण्यासाठी मला मेसेज करत आहेत. त्यांचे खूप खूप आभार, मला मिळणाऱ्या प्रेमाबद्दल मी स्वतःला खूप नशीबवान समजते. मी तुम्हाला सांगू इच्छिते की मी आता पूर्णपणे बरी आहे. मला वेळेत योग्य आणि चांगली मेडिकल ट्रिटमेंट मिळाली आहे.

दरम्यान, इलियाना डिक्रूझने बॉलिवूडसह साऊथमधील अनेक चित्रपटांमध्ये काम केले आहे. इलियाना डिक्रूझने वयाच्या 19 व्या वर्षी मॉडेलिंगपासून करिअरची सुरुवात केली. तिचा पहिला चित्रपट देवासु होता. या चित्रपटासाठी तिला साऊथमधील सर्वोत्कृष्ट नवोदित कलाकाराचा फिल्मफेअर पुरस्कारही मिळाला होता.

तसेच, इलियाना डिक्रूझने रणबीर कपूरसोबत बर्फी चित्रपटातून बॉलिवूडमध्ये पदार्पण केले होते. यानंतर अक्षय कुमारसोबत 'रुस्तम' या चित्रपटात इलियाना डिक्रूझने भूमिका साकारली होती. तसेच, 'बादशाहो', 'रेड' सारख्या बऱ्याच हिंदी चित्रपटात झळकली.