'फुलवंती'चा OTTवरही रेकॉर्ड! हॉलिवूड सिनेमाला टाकलं मागे; प्राजक्ता माळीने शेअर केला खास व्हिडीओ

'फुलवंती' सिनेमाने ओटीटीवरही हॉलिवूड सिनेमाला मागे टाकत रेकॉर्ड रचला आहे. याबाबत प्राजक्ताने व्हिडिओ शेअर करत प्रेक्षकांचे आभार मानले आहेत. 

अभिनेत्री प्राजक्ता माळी तिच्या 'फुलंवती' या सिनेमामुळे सध्या चर्चेत आहे.  या सिनेमातील प्राजक्ताच्या अभिनयाचं प्रचंड कौतुक होत आहे. तर तिच्या नृत्याने चित्रपट बहरला आहे. सिनेमाच्या प्रदर्शनाआधीच 'फुलवंती'मधील गाणी प्रचंड हिट झाली होती. काही दिवसांपूर्वीच हा सिनेमा ओटीटीवर प्रदर्शित झाला होता. अॅमेझॉन प्राइमवर हा सिनेमा रिलीज करण्यात आला होता. मात्र सिनेमा पाहण्यासाठी प्रेक्षकांना पैसे मोजावे लागत होते. आता मात्र या सिनेमाने ओटीटीवरही हॉलिवूड सिनेमाला मागे टाकत रेकॉर्ड रचला आहे. याबाबत प्राजक्ताने व्हिडिओ शेअर करत प्रेक्षकांचे आभार मानले आहेत. 

"नमस्कार मंडळी, आजपासून आपला 'फुलंवती' सिनेमा अॅमेझॉन प्राइमवर उपलब्ध झालेला आहे. खरं तर ८ नोव्हेंबरपासूनच 'फुलंवती' अॅमेझॉन प्राइमवर होता. पण, तेव्हा तुम्हाला त्याचं तिकीट काढावं लागायचं. म्हणजे सिनेमा रेंटवर होता. त्यामुळे वेगळे पैसे भरावे लागायचे. पण, TVOD मध्ये पॅन इंडिया लेव्हला 'फुलंवती' सिनेमा नंबर वन रँकला होता. म्हणजे सर्वाधिक तिकीट काढून बघितलेला सिनेमा अशी पदवी 'फुलंवती'ला मिळाली. जेव्हा की हॉलिवूड सिनेमा पण दुसऱ्या रँकला होता. पॅन इंडिया लेव्हला सलग २ आठवडे एक नंबरला असणं ही खरंच छान गोष्ट घडलेली आहे. त्यामुळे आता अॅमेझॉन प्राइमचं सबस्क्रिप्शन असलेल्या सगळ्यांनाच 'फुलंवती' फ्रीमध्ये बघता येणार आहे", असं प्राजक्ताने इन्स्टाग्रामवर शेअर केलेल्या व्हिडिओत म्हटलं आहे. 

"तुम्हा सगळ्यांच्या प्रेमळ प्रतिसादामुळे फुलवंती च आज #७ व्या आठवड्यात पदार्पण होतंय…आणि याच निमित्ताने आपला चित्रपट फुलवंती आजपासून Amazon Prime वर सर्वांसाठी उपलब्ध झाला आहे😇 चित्रपटगृहात चित्रपट चालू असताना OTT Platform वर इतका उदंड प्रतिसाद मिळणे, हे केवळ तुमच्या प्रेमामुळे शक्य झालं. फुलवंतीवर जितक प्रेम तुम्ही चित्रपटगृहात केलत, तितकंच प्रेम या माध्यमात देखील कराल याची खात्री आहे🥰 आणि चित्रपटगृहात अजूनही #shows चालू आहेतच", असं कॅप्शन अभिनेत्रीने दिलं आहे. त्यामुळे आता अॅमेझॉन प्राइमचं सबस्क्रिप्शन असणाऱ्यांना 'फुलंवती'  सिनेमा पाहता येणार आहे. 

११ ऑक्टोबरला प्राजक्ता माळीचा 'फुलवंती' सिनेमा थिएटरमध्ये प्रदर्शित करण्यात आला होता. 'फुलवंती'मध्ये मुख्य भूमिका साकारण्याबरोबरच प्राजक्ताने या सिनेमाची निर्मितीही केली आहे. तर स्नेहल तरडेंनी या सिनेमातून दिग्दर्शनात पाऊल टाकलं. प्राजक्ता माळीसह गश्मीर महाजनी या सिनेमात मुख्य भूमिकेत आहे. तर स्नेहल तरडे, प्रसाद ओक, वैभव मांगले, हृषिकेश जोशी या कलाकारांच्या महत्त्वाच्या भूमिका आहे. 'महाराष्ट्राची हास्यजत्रा'मधील काही कलाकारही 'फुलवंती' सिनेमात झळकले आहेत.