'बनवणारा मोदक अन् खाणाराही...' प्रथमेश लघाटेचा Video व्हायरल; मुग्धाने केली कमेंट

प्रथमेशचा हा व्हिडिओ चांगलाच व्हायरल होतोय.

'सारेगमप' लिटील चॅम्प्स फेम गायक प्रथमेश लघाटेबद्दल (Prathamesh Laghate) वेगळं सांगण्याची गरज नाही. त्याच्या गोड गळ्याने सर्वांनाच मंत्रमुग्ध केलं आहे. सध्या गणपतीच्या आगमनाने सगळीकडेच उत्साहाचं वातावरण आहे. प्रथमेशच्या घरीही बाप्पाचं आगमन झालं आहे. प्रथमेशचं घरल कोकणात असल्याने तिथे तर गणेशोत्सवाची वेगळीच धूम असते. नुकताच प्रथमेशने उकडीचे मोदक करतानाचा व्हिडिओ पोस्ट केला आहे. मोदकाने बनवले मोदक असं म्हणत सर्वच त्याचं कौतुक करत आहेत. 

प्रथमेश लघाटे 'सारेगमप' लिटील चॅम्प्समध्ये सर्वांचाच लाडका होता. पंचरत्नांमध्ये तो सर्वात मोठा होता. त्याला सेटवर सगळेच आणि नंतर प्रेक्षकही मोदक म्हणायचे. कारण प्रथमेशला गोड खाण्याची खूप आवड होती आणि त्यातल्या त्यात मोदक तर त्याचा सर्वात आवडीचा पदार्थ. त्यावेळी प्रथमेश मोदकाप्रमाणेच गोलमटोल होता. प्रथमेश उत्तम गायक तर आहेच पण त्याला स्वयंपाकाचीही खूप आवड आहे. दरवर्षी तो गणपतीला स्वत: मोदक बनवतो. यावर्षीही त्याने मोदक बनवले आहेत. सोवळं नेसून जमिनीवर बसून तो अगदी परफेक्ट मोदक बनवताना दिसतोय. याची झलक त्याने व्हिडिओ शेअर करत चाहत्यांना दाखवली. '  सालाबादप्रमाणे.. मोदक Making..' असं कॅप्शन त्याने दिलं आहे.

View this post on Instagram

A post shared by Prathamesh Umesh Laghate (@prathamesh_laghate_adhikrut)

प्रथमेशचा हा व्हिडिओ चांगलाच व्हायरल होतोय. 'करणारा मोदक आणि खाणाराही मोदकच..वाह', 'मुग्धा नशिबवान आहे' अशा भन्नाट कमेंट्स आल्या आहेत. यावर त्याची होणारी बायको आणि लिटिल चॅम्पची मॉनिटर मुग्धाची (Mugdha Vaishampayan) कमेंट तर असणारच. मुग्धालाही खायला प्रचंड आवडतं. तिने या व्हिडिओवर हार्ट इमोजी कमेंट केल्या आहेत. तर गायिका वैशाली सामंतने 'मोदक मेकिंग मोदक' अशी मजेशीर कमेंट केली आहे.

प्रथमेश आणि मुग्धा दोघंही लवकरच लग्नबंधनात अडकणार आहेत. काही दिवसांपूर्वीच दोघांनी प्रेमाची कबूली दिली आणि लोकांच्या आनंदाला पारावरच उरला नाही. अख्ख्या महाराष्ट्राने त्यांना शुभेच्छा दिल्या. दोघंही सोबतच गाण्याचे कार्यक्रम करत असतानाच त्यांच्यातील मैत्रीचं प्रेमात रुपांतर झालं.