प्रिया बापटने घडवली सफर

ने हमीच विविध भूमिकांमधून प्रेक्षकांचे मनोरंजन करणारी प्रिया बापट लवकरच आपल्याला दिलीप प्रभावळकर यांच्यासोबत चित्रपटात दिसणार आहे. दिलीप प्रभावळकर यांच्या प्रत्येक भूमिकेचेच प्रेक्षकांनी कौतुक केले आहे. ‘पिंपळ’ नावाच्या आगामी चित्रपटात एकदमच वेगळ्या अंदाजात दिलीप प्रभावळकर आणि प्रिया बापट प्रेक्षकांसमोर येणार आहेत. पांढरीशुभ्र दाढी आणि झुबकेदार मिशी वाढवलेले दिलीप प्रभावळकर या चित्रपटात प्रेक्षकांना दिसणार आहेत. या चित्रपटात त्यांची कोणती भूमिका असणार, याची सगळ्यांनाच उत्सुकता लागलेली आहे, तर प्रिया बापटदेखील हटके लूकमध्ये या चित्रपटात पाहायला मिळणार आहे. नुकतेच पुण्यामध्ये या चित्रपटाच्या काही भागांचे चित्रीकरण करण्यात आले. या वेळेस प्रियाने चक्क स्कूटीवरून दिलीप प्रभावळकर यांना पुणेदर्शन घडवून आणले. दिलीप प्रभावळकर यांच्यासोबत केलेल्या या चित्रपटाच्या चित्रीकरणाविषयी प्रियाने सीएनएक्ससोबत गप्पा मारल्या. ती सांगते, ‘मला दिलीपकाकांसोबत स्कूटीवरून फिरायला फारच मजा आली. मी खरे तर पुण्यातील रस्त्यांवर कधीच गाडी चालवली नव्हती. त्यात दिलीपकाकांना डबलसीट घ्यायचे म्हणजे मला थोडे टेन्शनच आले होते, पण आम्ही दोघांनीही चित्रीकरणाच्या वेळी फारच धमाल केली. मी पहिल्यांदा दिलीपकाकांसोबत काम करत आहे. त्यांच्यासोबत काम करण्याचा अनुभव तर मस्तच आहे. एका चांगल्या विषयावर काम करायला मिळत असल्याने मला आनंद होत आहे.’ प्रियाने दिलीप प्रभावळकर यांच्यासोबतचा या चित्रपटाच्या चित्रीकरणाच्या वेळेचा झक्कास फोटोदेखील सीएनएक्ससोबत शेअर केला आहे. या दोघांची ही धमाल स्कूटी रायडिंग पाहण्यासाठी आपल्याला चित्रपटाचीच वाट पाहावी लागणार आहे.