Bachpan ka Pyar Song: इन्स्टाग्रामवर बादशाहनं शेअर केला 'बचपन का प्यार' गाणाऱ्या मुलासह फोटो; म्हणाला, "लवकरच..."

Bachpan ka Pyar Song: छत्तीसगढमध्ये राहणाऱ्या सहदेव या मुलानं 'बचपन का प्यार' हे गायलेलं गाणं मोठ्या प्रमाणात लोकप्रिय झालं होतं. रॅपर बादशाहनं सहदेवसह शेअर केला फोटो.

Bachpan ka Pyar Song: सध्या एका लहान मुलानं गायलेलं गाणं सोशल मीडियावर मोठ्या प्रमाणात व्हायरल होत आहे. फटक्यात त्या मुलाच्या आवाजातील गाण्याचा व्हिडीओ व्हायरल झाला आणि त्यानंतर छत्तीगढमधझील सुकमा जिल्ह्यातील छिन्दगढ येथे राहणारा सुखदेव फेमस झाला. हा व्हिडीओ जेव्हा प्रसिद्ध रॅपर बादशाहच्या नजरेस पडला तेव्हा त्यालादेखील तो पसंत पडला. त्यानंतर त्यानं सहदेवची भेट घेतली. बादशाहनं आपल्या सोशल मीडिया अकाऊंटवरून दोघांचा एक फोटोही शेअर केला आहे. जेव्हा बादशाहला भेटून सहदेव चंडीगडवरून छत्तीसगढमध्ये परतला तेव्हा छत्तीसगढचे मुख्यमंत्री भूपेश बघेल यांनादेखील त्याच्या तोंडून ते गाण ऐकण्याचा मोह आवरला नाही. मुख्यमंत्र्यांना गाणं ऐकवतानाचाही व्हिडीओ मोठ्या प्रमाणात व्हायरल होत आहे. 

बादशाह सहदेवसह आपल्या स्टाईलमध्ये हे गाणं सर्वांच्या समोर आणणार आहे. नुकताच बादशाहनं इंटरनेटवर एक व्हिडीओही शेअर केला होता. ज्यामध्ये बादशाहसोबतस आणखी तीन जण गाण्याच्या नव्या बीटवर धमाल करताना दिसले होते. यामध्ये सहदेव दिसला नव्हता. परंतु तो यात असेल अशा शक्यता वर्तवण्यात येत आहेत. 

सहदेवचा हा व्हिडीओ शाळेतील शिक्षकासमोर गाताना तयार करण्यात आला होता. त्यानंतर तो सोशल मीडियावर मोठ्या प्रमाणात व्हायरल झाला होता. दरम्यान, जेव्हा हा व्हिडीओ इंटरनेटवर व्हायरल झाला त्यानंतर अनेकांनी या गाण्यावर आपला व्हिडीओ तयार केला होता.