'दिवाळी पहाट' कार्यक्रमात दिसली सई ताम्हणकरच्या आलिशान घराची झलक, Video पाहिलात का?

सई ताम्हणकर हिने आपल्या मुंबईतील नव्या घरी 'दिवाळी पहाट' कार्यक्रमाचे आयोजन केलं होतं.

Diwali Pahat At Sai Tamhankar Home : दिवाळी हा प्रत्येकाच्या आयुष्यात आनंदाची पर्वणी घेऊन येणारा महत्त्वाचा सण. यंदा देशभरात दिवाळीचा उत्साह पाहायला मिळाला.  दिवाळी सेलिब्रेशनमध्ये कलाकारसुद्धा मागे नाहीत. कलाकारांचे दिवाळी सेलिब्रेशनचे फोटो आणि व्हिडीओ समोर येत आहेत. मराठमोळी अभिनेत्री सई ताम्हणकर हिची यंदाची दिवाळी खास होती. आपल्या नव्या घरात सईनं दिवाळी साजरी केली. 

सई ताम्हणकर हिने आपल्या मुंबईतील नव्या 'द इलेव्हेंथ प्लेस' या घरी 'दिवाळी पहाट' कार्यक्रमाचे आयोजन केलं होतं. सईने सोशल मीडियावर तिच्या यंदाच्या 'दिवाळी पहाट' कार्यक्रमाची झलक शेअर केली आहे. 'दिवाळी पहाट' कार्यक्रमात यावेळी लोकप्रिय सतारवादक मेहताब अली नियाझी उपस्थित होते. तर त्यांना तबला वादनासाठी खुर्रम अली नियाझी यांची साथ मिळाली.

सईची आई मृणालिनी ताम्हणकर यांच्यापासून सईची 'मानवत मर्डर्स' ची टीम आणि इतर जवळची काही कलाकार मंडळी या कार्यक्रमात उपस्थित असल्याचं पाहायला मिळालं. सर्वांना तबला आणि सतारच्या जुगलबंदीचा आस्वाद घेता आहे. विशेष म्हणजे यातून चाहत्यांना सईचं घराची झलक दिसली. तिने शेअर केलेल्या व्हिडीओमध्ये सईनं अगदी सुंदर पद्धतीने घर सजवल्याचं दिसून आलं. सईने व्हिडीओ शेअर करताच घरातील आकर्षक शोभेच्या वस्तू, मोठमोठ्या खिडक्या, फर्निचर, त्याचबरोबर हॉलमध्ये ठेवलेली झाडं आणि प्रशस्त खोल्यांनी चाहत्यांना लक्ष वेधून घेतलं. 

 सईचं हे 'द इलेव्हन्थ प्लेस' घर तिने गेल्या वर्षी सप्टेंबर महिन्यात घर खरेदी केलं होतं. संघर्षाच्या काळात १० ठिकाणी राहिल्यानंतर तिने आपली हक्काची ११ वी जागा घेतली. हे तिचं अकरावं घर असल्याने तिने याला 'द इलेवन्थ प्लेस' असं नाव दिलं आहे.  मूळच्या सांगली जिल्ह्यातील सईने कष्ट, मेहनतीच्या जोरावर नाव मिळवलं. मराठी इंडस्ट्रीसह बॉलिवूडमध्येही आता ती लोकप्रिय आहे.