सलमानने त्याच्या चाहत्यांना केले सतर्क!

सलमान खान नेहमीच त्याच्या चाहत्यांशी कनेक्ट राहणे पसंत करतो. त्याचबरोबर त्यांची वेळोवेळी काळजीही घेताना दिसतो. याचा प्रत्यय नुकताच आला असून, त्याच्या चाहत्यांना सतर्क करण्यासाठी त्याने एक चेतावणी दिली आहे. त्याचे झाले असे, की सलमान ‘बीइंग ह्यूमन’ नावाची संस्था चालवितो. मात्र, या संस्थेच्या नावाने सोशल मीडियावर बरेचसे अकाऊंट आणि काही वेबसाइटही आहेत. ज्यामुळे सलमानच्या चाहत्यांचा गोंधळ होऊ शकतो. तसेच त्यांची फसवणूकही होण्याची दाट शक्यता आहे. अशात चाहत्यांना सतर्क करण्यासाठी सलमानने एक आवाहन केले आहे. सलमानने त्याच्या ट्विटर हॅण्डलवरून चाहत्यांना सतर्क करण्यासाठी एक पोस्ट शेअर केली आहे. त्यामध्ये लिहिले की, ‘आम्ही तुम्हाला सतर्क करतो. कारण बऱ्याचशा बनावट वेबसाइटवरून असा दावा केला जात आहे की, आम्ही सलमान खान आणि त्याच्या बीइंग ह्यूमन या संस्थेबरोबर काम करीत आहोत. मात्र, यांचा सलमान किंवा त्याच्या संस्थेशी काहीही संबंध नसून केवळ लोकांची फसवणूक करण्यासाठीच या संस्था कार्यरत आहेत. या वेळी सलमानने यामध्ये काही नावेही जाहीर केली आहेत. अमित आहुजा, समीर आणि रवी मल्होत्रा ही नावे या लिस्टमध्ये आहेत.