समंथा रुथ प्रभू बनली सर्वात लोकप्रिय भारतीय सेलिब्रिटी; करिना, दीपिकालाही टाकलं मागे

समंथाने पटकावला अव्वल क्रमांक, करिना, दीपिकालाही टाकलं मागे

साऊथ अभिनेत्री समांथा रुथ प्रभू (Samantha Ruth Prabhu)आता बॉलिवूडमध्येही आपला जम बसवत आहे. तिची नुकतीच 'सिटाडेल हनी बनी' ही सीरिज रिलीज झाली.  यातील तिच्या भूमिकेचं कौतुक झालं. वरुण धवनसोबत तिने स्क्रीन शेअर केली आहे. दरम्यान समंथाची दखल IMDb नेही घेतली असून त्यांच्या रेटिंगमध्ये ती पहिल्या स्थानावर आली आहे. 

या आठवड्यातील IMDb च्या लोकप्रिय भारतीय सेलिब्रिटींच्या यादीत 'सिटाडेल: हनी बनी' या सीरिजमधल्या कलाकारांचे नाव झळकत आहे. समंथा रुथ प्रभू पहिल्या स्थानावर तर वरुण धवन २५व्या स्थानावर आहे. यामुळे समंथाचे चाहतेही चांगलेच आनंदी झाले आहेत. गेल्या काही वर्षांपासून समांथा वैयक्तिक आयुष्यात बऱ्याच प्रसंगांना सामोरी जात आहे. त्यात आता ही बातमी दिलासा देणारी आहे.

याशिवाय, भूल भुलैया ३ या चित्रपटाचे कलाकार देखील यादीत आपला दबदबा कायम ठेवत आहेत. तृप्ती डिमरी ५व्या स्थानावर, कार्तिक आर्यन १४व्या स्थानावर, दिग्दर्शक अनीस बज्मी १९व्या स्थानावर, तर विद्या बालन ३५व्या स्थानावर आहेत.

द बकिंगहॅम मर्डर्स चित्रपटाच्या स्ट्रीमिंग रिलीजनंतर करीना कपूरने १०वे स्थान मिळवले आहे. तसेच शाहरुख खान, ऐश्वर्या राय बच्चन आणि दीपिका पदुकोण अनुक्रमे ३रे, ४थे, आणि ९वे स्थान कायम ठेवत यादीत आपली उपस्थिती टिकवून ठेवली आहे.

IMDb अॅपवर (फक्त Android आणि iOS साठी उपलब्ध) लोकप्रिय भारतीय सेलिब्रिटी फीचर दर आठवड्याला भारतातील सर्वाधिक चर्चेत असलेल्या कलाकारांना आणि चित्रपट निर्मात्यांना प्रकाशझोतात आणते. IMDb ला दरमहा २० कोटीहून अधिक लोक भेट देतात, ज्यामुळे ही यादी तयार केली जाते. मनोरंजनप्रेमींना यामध्ये दर आठवड्याला कोणता सेलिब्रिटी ट्रेंडमध्ये आहे हे पाहता येते, आपल्या आवडत्या कलाकारांना फॉलो करता येते आणि नवोदित कलाकारांना ओळखण्याची संधी मिळते.