मराठीत आजवर न पाहिलेली पॉवरफुल्ल अ‍ॅक्शन! समीत कक्कड यांचा 'रानटी' या तारखेला होणार रिलीज

शरद केळकरची प्रमुख भूमिका असलेल्या आगामी रानटी या मराठी सिनेमाची उत्सुकता शिगेला आहे (sharad kelkar, raanti)

सध्या मराठी मनोरंजन विश्वात एका चित्रपटाची चांगलीच चर्चा आहे. या चित्रपटाचं नाव 'रानटी'. काही चित्रपटांची लोकांना उत्सुकता असते तर काही दिग्दर्शकांच्या आगामी सिनेमांची लोक आतुरतेने वाट पाहत असतात. असेच दिग्दर्शक म्हणजे समीत कक्कड. आजवरच्या आपल्या  कामाने आणि अनोख्या सादरीकरणाने समितनं रसिकांसोबतच सिनेसृष्टीचंही मन जिंकलं आहे.  कायम वेगवेगळ्या धाटणीच्या कलाकृती बनवण्याला प्राधान्य देणारे समित कक्कड आता ‘रानटी’ हा मराठीतला मोठा अ‍ॅक्शनपट घेऊन आले आहेत.  

संजय दत्त-जॅकी श्रॉफने शेअर केला 'रानटी'चा टीझर

बॉलीवूडचे सुप्रसिद्ध नायक जॅकी श्रॉफ आणि संजय दत्त यांनी या चित्रपटाच्या दमदार टिझरची झलक  सोशल मीडियामध्ये शेअर केली आहे. या टिझरला अल्पावधीतच उत्तम प्रतिसाद मिळाला आहे. कोणत्याही कथाविषयाचं अत्यंत बारकाईनं संशोधन करून मगच आपल्याला उमगलेलं चित्र पडद्यावर  प्रभावीपणे  सादर करायचं हे समित यांच्या यशाचं गमक असल्याचं त्याच्या आजवरच्या प्रवासावर नजर टाकल्यावर अगदी सहजपणे लक्षात येतं.

दिग्दर्शक समित कक्कड यांच्या कलाकृतीमध्ये कायम नाविन्यपूर्ण विषय पाहायला मिळतात. धारावी बँक, इंदोरी इश्क, हाफ तिकीट, आयना का बायना, आश्चर्यचकीत, ३६ गुण अशा भन्नाट कथानकांची स्टाईल हाताळणाऱ्या आणि सादर करण्याची क्षमता असणाऱ्या दिग्दर्शक समित कक्कड यांनी आपली गुणवत्ता जपण्याचा कायम प्रयत्न केला आहे. पुनीत बालन स्टुडिओ निर्मित आणि समित कक्कड दिग्दर्शित ‘रानटी’  हा अ‍ॅक्शनपट २२ नोव्हेंबरला प्रेक्षकांच्या भेटीला येणार आहे.   

"मोठ्या पडद्यावर मराठीत आजवर न पाहिलेली पॉवरफुल्ल अ‍ॅक्शन ‘रानटी’ चित्रपटातून पहायला मिळणार आहे. अंगावर रोमांच आणणारे स्टंटस आता ‘रानटी’ अॅक्शपटात पहायला मिळणार आहे. काही मोजके अॅक्शनपट सोडले तर अॅक्शन मसाल्यासाठी मराठी चित्रपटांचा प्रेक्षकही हिंदी चित्रपटांकडे वळतो. म्हणूनच एक नवीन प्रयोग आणि मराठी चित्रपटांच्या आशयाला अॅक्शनचा तडका देण्यासाठी मी 'रानटी' हा अॅक्शनपॅक्ड चित्रपट मराठीत घेऊन आलोय", असं समित  सांगतात.