'शाका लाका बूम बूम' फेम संजू अडकला लग्नाच्या बेडीत, मराठी पद्धतीने पार पडला विवाहसोहळा

संजूची भूमिका साकारणारा अभिनेता किंशुक वैद्यचा शुभविवाह झाला आहे. त्याच्या लग्नाचे फोटो समोर आले आहेत.

दिवाळीनंतर सध्या सगळीकडेच लगीनसराई सुरू आहे. कलाविश्वातही सनई चौघडे वाजत आहेत. अनेक कलाकारांच्या घरी लगीनघाई सुरू आहे. काही सेलिब्रिटी लग्नाच्या बेडीत अडकण्याच्या तयारीत आहेत. तर काहींनी लग्नगाठ बांधून नव्या आयुष्याला सुरुवात केली आहे. 'शाका लाका बूम बूम' फेम संजूचं देखील शुभमंगल सावधान झालं आहे. संजूची भूमिका साकारणारा अभिनेता किंशुक वैद्यचा शुभविवाह झाला आहे. त्याच्या लग्नाचे फोटो समोर आले आहेत. 

किंशुक वैद्यने गर्लफ्रेंड दिक्षा नागपाल हिच्यासह कुटुंबीय आणि मित्रपरिवाराच्या उपस्थितीत शुक्रवारी(२२ नोव्हेंबर) सात फेरे घेतले. मराठी पद्धतीने त्यांचा लग्न सोहळा पार पडला. अलिबागमध्ये किंशुक आणि दिक्षा यांनी लग्नगाठ बांधली. लग्नासाठी किंशुक आणि दिक्षा यांनी पारंपरिक पेहराव केला होता. धोतर आणि फेटामध्ये किंशुक राजबिंडा दिसत होता. तर नऊवारी साडीत दिक्षाचं सौंदर्य खुलून आलं होतं. त्यांच्या लग्नाचे फोटो सोशल मीडियावर व्हायरल झाले आहेत. 

 किंशुक आणि दीक्षा यांनी गेल्या वर्षी ऑगस्ट महिन्यात साखरपुडा केला होता. किंशुक वैद्य आणि दीक्षा नागपाल एकमेकांना बऱ्याच काळापासून डेट करत होते. अखेर लग्नाच्या बेडीत अडकत त्यांनी एकमेकांबरोबर आयुष्य घालवण्याचा निर्णय घेतला आहे.  किंशुकला 'शका लाका बूम बूम' या मालिकेमुळे प्रसिद्धी मिळाली. त्याने 'कर्णसंगिनी', 'वो तो है अलबेला', 'जात ना पूछे प्रेम की', 'राधाकृष्ण', 'वो अपना सा', 'एक रिश्ता साझेदारी का' या मालिकांमध्येही काम केले आहे.  दीक्षा नागपालच्या आधी तो शिव्या पठानियासोबत रिलेशनशिपमध्ये होता.  मात्र, 2021 मध्ये ते विभक्त झाले. दीक्षा एक प्रोफेशन्ल कोरियोग्राफर आहे. तिने टीव्ही, ओटीटी आणि सिनेमांमध्ये काम केलं आहे.