‘द फॅमिली मॅन’मुळे दिल्या होत्या शिव्या; आता रानटीमध्ये विष्णू म्हणून पहायची उत्सुकता!

'रानटी' या चित्रपटातून शरद केळकर अभिनयाचा करिष्मा दाखविण्यास सज्ज

Raanti Movie : एखाद्या कलाकाराच्या अभिनयाची सच्ची पावती म्हणजे त्याची भूमिका इतकी खरी वाटावी की त्या पात्राला लोकांनी शिव्या द्याव्यात. प्रसिद्ध अभिनेता शरद केळकर यांच्याबाबत ‘द फॅमिली मॅन’ मधील अरविंदची भूमिका साकारताना असेच घडले होते. आता पुन्हा 'रानटी' या चित्रपटातून शरद केळकर अभिनयाचा असाच करिष्मा दाखविण्यास सज्ज झाले आहेत.

‘द फॅमिली मॅन’ या वेब सीरिजमध्ये शरद केळकर यांनी प्रसिद्ध अभिनेते मनोज वाजपेयी आणि अभिनेत्री प्रियामणी यांच्यासोबत उत्कृष्ट अभिनय केला आहे. मनोज वाजपेयी यांनी श्रीकांत तिवारी या रॉ एजंटची भूमिका केली आहे. प्रियामणी ही म्हणजे श्रीकांतची पत्नी सुची आहे. श्रीकांत देशासाठी लढण्यासाठी कामगिरीवर आहे. अरविंदने म्हणजेच अभिनेता शरद केळकरने  सूची म्हणजेच अभिनेत्री प्रियामणीच्या मित्राची भूमिका केली आहे. सुचीला अरविंद भावनिक आधार देत असतो. त्यांच्यात थेट प्रेम संबंध नसले तरी मैत्री आहे. अरविंद सुचीची नेहमी काळजी घेत असतो. शरद केळकर यांचा रुबाबदारपणा आणि उत्कट अभिनय पाहून प्रेक्षकांना अनेक प्रसंगात वाटते की सूची अरविंदच्या  प्रेमात पडेल आणि श्रीकांतला  सोडून जाईल. 

त्यांची मैत्री श्रीकांत प्रमाणेच चाहत्यांना देखील खटकलेली दिसतेय. यामुळे अरविंदला अनेकांनी शिव्याही दिल्या होत्या. एका मुलाखतीत शरद केळकर तर म्हणाला होता की मला सोशल मीडियावर रोज धमक्यांचे मेसेज येऊ लागले आहेत. यात अनेक जण सूची आणि श्रीकांतच्यामध्ये येऊ नको नाहीतर जीवे मारू अशा धमक्या येत आहेत.

हे सगळे सांगण्याचे कारण म्हणजे  नुकत्याच आलेल्या 'रानटी'च्या ट्रेलरमध्ये शरद केळकरचा  जबरदस्त अभिनय दिसून येत आहे. शरद केळकरचं नाव विष्णू आहे. त्याला नरसिंह नावाने सर्व घाबरतात. शरद केळकरवर सर्व गुंड मिळून मोठं संकट आणतात. शरद केळकरने प्रथमच मराठी मध्ये नायकाची भूमिका साकारली आहे. ‘द फॅमिली मॅन’ ची आठवण त्यामुळे जागी झाली आहे.